మెగాస్టార్ చిరంజీవి 151 వ చిత్రంగా వస్తున్న ‘సైరా’ చిత్రం షూటింగ్ ఇటీవల పూర్తయ్యింది. ఉయ్యాల వాడ నరసింహరెడ్డి జీవిత ఆధారంగా తెరకెక్కుతున్న ఈ చిత్రం… చిరంజీవికి డ్రీమ్ ప్రాజెక్ట్. అందుకే ఈ చిత్రాన్ని ఖర్చుకి వెనుకాడకుండా.. ఆయన తనయుడు రాంచరణ్ నిర్మిస్తున్నాడు. ప్రస్తుతం పోస్ట్ ప్రొడక్షన్ పనులన్నిటినీ చిరంజీవి దగ్గరుండి చూసుకుంటున్నారట. డైరెక్టర్ సురేందర్ రెడ్డికి దగ్గరుండి చిరంజీవి సలహాలు ఇస్తున్నారట. మెగాస్టార్ కు అత్యంత సన్నిహితులైన వారందరికీ ‘సైరా’ రషెస్ చూపించి వారి.. అభిప్రాయాల్ని తెలుసుకుంటున్నారట.
ఇటీవల రచయిత సత్యానంద్ కు చూపించారట. ఇక ఇదే వారంలో దర్శకేంద్రుడు కె.రాఘవేంద్రరావు గారికి కూడా ‘సైరా’ రషెస్ ను చూపిస్తారట. ఇలా వీరికి చూపించి వారి అభిప్రాయాల్ని తెలుసుకుని.. తద్వారా అవసరమైన చోట్ల మార్పులు చేయించాలని చిరంజీవి భావిస్తున్నారట. అందుతున్న సమాచారం ప్రకారం.. దర్శకధీరుడు రాజమౌళి కి కూడా అతి త్వరలో ‘సైరా’ ని చూపించబోతున్నారట. విజువల్ ఎఫెక్ట్స్ కు ప్రాధాన్యత ఉన్న చిత్రం కాబట్టి… అందులో సిద్ధహస్తుడైన రాజమౌళి సలహాలు తీసుకుంటే మంచిదని చిరు ఇలా డిసైడ్ అయినట్టు తెలుస్తుంది. ఇక ‘సైరా’ చిత్రాన్ని అక్టోబర్ 2 న ప్రేక్షకుల ముందుకు తీసుకురావాలని ప్లాన్ చేస్తున్నట్టు సమాచారం.
