కోలీవుడ్ సీనియర్ నటి వడివుక్కరసి గురించి సోషల్ మీడియాలో ఓ వార్త వైరల్గా మారింది. ఆమె అనారోగ్యంతో కన్నుమూశారంటూ కొందరు ప్రచారం చేశారు. దీంతో ఆమె అభిమానులు, తమిళ సినీ వర్గాలు ఆందోళనకు గురయ్యాయి. అయితే ఈ వార్తల్లో నిజం లేదని ఆమె స్వయంగా చెప్పడంతో అందరూ ఊపిరి పీల్చుకున్నారు. ‘‘నేను బతికే ఉన్నాను. ఎలాంటి ఆరోగ్య సమస్యలు లేవు. నా ఆరోగ్యం విషయంలో ఆందోళన చెందవద్దు’’ అని ఆమె ఓ టీవికి ఇచ్చిన ఇంటర్వ్యూలో చెప్పారు.
దీంతో బతికున్న మనిషి గురించి ఇలాంటి వ్యాఖ్యలు చేయడం సరికాదు అంటూ సగటు సినిమా అభిమానులు ఆందోళన వ్యక్తం చేశారు. చిత్ర పరిశ్రమలోకి 1978లో అడుగుపెట్టారు వడివుక్కరసి. తమిళంతో పాటు తెలుగు, కన్నడ, మలయాళ భాషల్లో 350కి పైగా సినిమాల్లో నటించి మెప్పించారు. అలాగే 40 టీవీ సీరియల్స్లో కీలక పాత్రలు పోషించారు. చిరంజీవి, మోహన్బాబు సినిమా ‘పట్నం వచ్చిన పతివ్రతలు’ తోపాటు ‘నేటి సిద్ధార్థ’ సినిమాలోనూ నటించారామె.
కెరీర్ తొలి రోజుల్లో ఎక్కువగా ప్రతినాయక ఛాయలున్న పాత్రలు చేసిన వడివుక్కరసి ఆ తర్వాత క్యారెక్టర్ ఆర్టిస్ట్గా కొనసాగారు. ఎన్టీఆర్ ‘అశోక్’ సినిమాలో విలన్గా వావ్ అనిపించిన ఆమె.. సునీల్ ‘అందాల రాముడు’ సినిమాలో బామ్మగా భావోద్వేగాన్ని బాగా పండించారు. అలాంటామెకు అనారోగ్యం అంటూ, చనిపోయారంటూ వార్తలు వ్యాప్తి చేయడంతో ఆమెతోపాటు, అభిమానులు, ప్రేక్షకులు కూడా ఆందోళన వ్యక్తం చేశారు.
గతంలో తెలుగు సినిమా నటుల విషయంలో ఇలాంటి పరుష వ్యాఖ్యలు చాలానే చేశారు నెటిజన్లు. కొంతమంది నటులు, వారి కుటుంబసభ్యులు అయితే స్ట్రాంగ్గా రిప్లై ఇవ్వగా.. ఇంకొందరు అయితే ‘నా చావుతో వారు లైక్లు సంపాదిస్తున్నారు’ అంటూ నవ్వేశారు. వడివుక్కరసి అయితే ‘నేను బతికున్నా..’ అంటూ బాధగా క్లారిటీ ఇచ్చుకున్నారు.
