వెంకీ, చైతూ మల్టీ స్టారర్ సినిమాకి ఆసక్తికర టైటిల్

యువ సామ్రాట్ నాగచైతన్య తండ్రి నాగార్జునతో కలిసి మనం సినిమా చేసి విజయాన్ని అందుకున్నారు. అయితే తన మేనమామ వెంకటేష్ తో కలిసి పూర్తి స్థాయి సినిమా చేయలేదు. ప్రేమమ్ సినిమాలో వెంకీ కాసేపు కనిపించి విజిల్స్ వేయించారు. ఈసారి ఇద్దరూ కలిసి రెండున్నర గంటల సేపు వినోదాన్నిపంచడానికి సిద్ధమవుతున్నారు. జై లవకుశ సినిమాతో హిట్ ట్రాక్ లోకి వచ్చిన బాబీ వెంకీ, చైతూ కోసం ఓ అద్భుతమైన స్క్రిప్ట్ ని రెడీ చేశారు. ఈ చిత్రాన్ని సురేష్ బాబు, కోన వెంకట్, పీపుల్ మీడియా ఫ్యాక్టరీ వాళ్ళు కలిసి నిర్మించనున్నారు.

ఇందులో వెంకటేష్ సరసన హుమా ఖ్యూరేషి నటిస్తుండగా, నాగచైతన్య పక్కన రకుల్ ప్రీత్ సింగ్ మరోసారి ఆడిపాడనుంది. ప్రీ ప్రొడక్షన్ వేగంగా జరుపుకుంటున్న ఈ మూవీకి ఆసక్తికర టైటిల్ ఫిక్స్ చేసినట్లు ఫిలిం నగర్ వాసులు చెప్పారు. “వెంకీ మామ” అనే టైటిల్ ని చిత్రబృందం ఖరారు చేసిందని, త్వరలోనే అధికారికంగా వెల్లడించనున్నట్లు తెలిసింది. ఈ సినిమాతో పాటు అనిల్ రావిపూడి దర్శకత్వంలో వెంకటేష్ f2 చిత్రాన్ని పూర్తి చేయనున్నారు. ఇందులో వరుణ్ తేజ్ తో కలిసి స్క్రీన్ షేర్ చేసుకోబోతున్నారు. ఈ రెండు చిత్రాల కోసం వెంకటేష్ అభిమానులు ఎదురుచూస్తున్నారు.