మూకీ సినిమాలో నటించనున్న వెంకటేష్

తెలుగు సినిమా ప్రయాణం మాటల లేకుండానే మొదలయిన సంగతి తెలిసిందే. అయితే మాటలు నేర్చుకొని, రంగులు అడ్డుకున్న తర్వాత కూడా విశ్వనటుడు కమలహాసన్ మూకీ చేయడానికి ఒకే చెప్పారు. సింగీతం శ్రీనివాసరావు అద్భుతంగా పుష్పక విమానం తీసి హిట్ కొట్టారు. అప్పటి నుంచి ఇప్పటివరకు చాలా మంది మూకీ సినిమా తీయాలని ప్రయత్నించినా.. అది సెట్స్ వరకు వెళ్ళలేదు. అయితే ఫిలిం నగర్ వాసుల తాజా సమాచారం ప్రకారం మరో మూకీ రెడీ రానున్నట్లు తెలిసింది. భాగమతి సినిమా ద్వారా పరిశ్రమ దృష్టిని ఆకర్షిణా దర్శకుడు అశోక్ గతంలో విక్టరీ వెంకటేష్ కి ఓ మూకీ కథను వినిపించారంట. అయితే అప్పుడు అశోక్ ట్రాక్ రికార్డ్ పెద్దగా లేకపోవడంతో వెంకీ ఆలోచించినట్టు టాక్.

భాగమతి సినిమా చూసిన తర్వాత అశోక్ ఈ ప్రాజక్ట్ కి న్యాయం చేయగలడని నమ్ముతున్నారు. ప్రస్తుతం వెంకటేష్ తేజ దర్శకత్వంలో ఆట నాదే.. వేట నాదే అనే సినిమా చేస్తున్నారు. దీని తర్వాత త్రివిక్రమ్ దర్శకత్వంలో మూవీ చేయనున్నారు. ఈ రెండు ప్రాజక్ట్స్ పూర్తి కావడానికి దాదాపు ఏడాది పడుతుంది కాబట్టి ఆ తర్వాత అశోక్ కి అవకాశం ఇచ్చే ఆస్కారం ఉందని టాక్. దీనిపై అశోక్ స్పందిస్తూ ” నేను గతంలో వెంకటేష్ గారి కోసం ఓ మూకీ కథను రాసుకున్నాను. ఎప్పటికైనా ఆ కథను ఆయనతోనే తెరకెక్కిస్తాను. మరో మంచి సినిమా తీసి విజయం సాధించాక వెళ్ళి ఆయనను కలుస్తాను” అన్నారు. అశోక్ పట్టుదలను వెంకీ మెచ్చుకొని తప్పకుండా ఛాన్స్ ఇస్తారని సినీ విశ్లేషకులు భావిస్తున్నారు.