Vikram: ఆకలి తీరే టైమ్‌ వచ్చేసింది.. ఒకేసారి 4 సినిమాలతో స్టార్‌ హీరో

కొంతమంది హీరోలు సినిమాలు చేయకపోతే ఇండస్ట్రీకి, సినిమా ప్రేమికులకు ఇబ్బంది. వసూళ్ల పరంగానే కాదు.. పరిశ్రమ పరంగానూ వారి ఆబ్సెన్స్‌ నష్టం చేకూరుస్తుంది. అలాంటి హీరోల్లో విక్రమ్‌ ఒకరు. ఏ రెండు వరుస సినిమాలు ఒకేలా ఉండని ఓ ఫిల్మోగ్రఫీ చూడాలి అని మీకు అనిపిస్తే.. విక్రమ్‌ సినిమాల లిస్ట్‌ చూడాల్సిందే. అంతలా వైవిధ్యమైన సినిమాలు చేస్తూ వచ్చారాయన. అయితే వరుస పరాజయాలు, చేసిన సినిమాలు విడుదల కాకపోవడం వంటి కారణాల వల్ల కొత్త సినిమాలు చేయడం లేదు.

Vikram

దీంతో ఆయన అభిమానులకు, సినిమాల అభిమానులకు ఓ వెలితి ఏర్పడింది. ఒక విధంగా చెప్పాలి అంటే విక్రమ్‌ ఫ్యాన్స్‌ ఆకలితో ఉన్నారు. మా హీరో నుండి సరైన సినిమా రావాలి అని కోరుకుంటున్నారు. వారికి ఫుల్ మీల్స్‌ కుదిరితే బఫే పెట్టడానికి ఇప్పుడు రెడీ అయ్యాడు. ఒకేసారి నాలుగు సినిమాలను అనౌన్స్‌ చేసి వావ్‌ అనిపించాడు. ఈ ప్రాజెక్టులకు సంబంధించిన వివరాల్ని పూర్తిగా వెల్లడించనప్పటికీ.. నాలుగు సినిమాలు చేయనున్నట్లు పోస్ట్‌ అయితే పెట్టాడు.

కొన్నిసార్లు నిశ్శబ్దం కూడా ఒక లాంటి ప్రిపరేషన్‌. నన్ను కదిలించే కథల కోసం ఇన్నాళ్లూ ఎదురుచూస్తూ గడిపాను. నేను ఎంతో ఆరాధించే దర్శకులతో విభిన్నమైన నాలుగు సినిమాలు చేయబోతున్నాను. ఈ ప్రయాణాల గురించి పూర్తి వివరాలు మీతో షేర్‌ చేసుకోవడానికి ఆసక్తిగా ఎదురుచూస్తున్నాను అని ఆ పోస్ట్‌లో రాసుకొచ్చాడు విక్రమ్‌. ఆ సినిమాల కథలు, దర్శకుల వివరాలు తెలియాలంటే కొన్ని రోజులు వేచి చూడాల్సిందే.

అయితే, విక్రమ్‌ 63, 64, 65 సినిమాలు అంటూ కొన్ని పోస్టర్లు ఆ మధ్య విడుదలయ్యాయి. అయితే ఆ తర్వాత వాటి గురించి ఎక్కడా ప్రస్తావన లేదు. ఇవి కాకుండా ‘ధృవ నక్షత్రం’ సినిమా ఎప్పుడో పూర్తయిపోయి.. విడుదలకు నోచుకోకుండా ఉంది. ఆ సినిమా మీద ఇక ఆశలు వదులుకోవాల్సిందే అని కోలీవుడ్‌ వర్గాల సమాచారం.

మాట మార్చిన కమల్‌.. KHxRK టైటిల్‌ కార్డులో ఈ మార్పు గమనించారా?