ఇటీవల ఎన్టీఆర్ (NTR) నుంచి వచ్చిన దేవర సినిమా భారీ వసూళ్లు సాధించిన విషయం తెలిసిందే. బాక్సాఫీస్‌ వద్ద ఘన విజయం సాధించడంతో టాలీవుడ్‌ టాప్ 5 చిత్రాల్లో స్థానం సంపాదించింది. అయితే ఆ సినిమా ప్రమోషన్‌ కార్యక్రమాలు ముగిసిన వెంటనే ఎన్టీఆర్ ముంబై వెళ్లి హృతిక్ రోషన్ తో (Hrithik Roshan) కలిసి వార్ 2 సినిమాలో యాక్షన్ సన్నివేశాలను షూట్‌ చేశాడు. ఇటీవల వార్ 2 (War 2) నుంచి ఎన్టీఆర్ కి సంబంధించిన ఒక లీక్ ఫోటో సోషల్ మీడియాలో వైరల్‌ అయింది.
యాక్షన్ సన్నివేశాల కోసం ఎన్టీఆర్ హార్డ్ వర్క్ చేస్తున్నట్లు ఆ లుక్ ద్వారా క్లారిటీ వచ్చేసింది. హృతిక్ రోషన్ తో సమానంగా ఉండే యాక్షన్ సన్నివేశాలను పర్ఫెక్ట్ గా పండించేందుకు దర్శకుడు అయాన్ ముఖర్జీ ప్రత్యేక దృష్టి పెట్టారని తెలుస్తోంది. ప్రస్తుతం వీరిద్దరి మధ్య డాన్స్ సీక్వెన్స్ కోసం ఏర్పాట్లు జరుగుతున్నాయి. ఎన్టీఆర్, హృతిక్ ఇద్దరూ డాన్స్ లో ఎక్కడా తగ్గని స్టెప్స్ వేయడం అభిమానులకు పండగ వంటిదని చెప్పుకోవచ్చు.
ఈ పాట చిత్రీకరణ కోసం భారీ సెట్‌ వేసిన మేకర్స్, మూడురోజుల పాటు పాటను చిత్రీకరించేలా ప్లాన్‌ చేశారు. ఆ సాంగ్ కోసం టాప్ కొరియోగ్రాఫర్ రంగంలోకి దిగనున్నట్లు తెలుస్తోంది. పాట కూడా యాక్షన్ సీక్వెన్స్ లాగే ప్రేక్షకులను ఆకట్టుకుంటుందని మేకర్స్ చెబుతున్నారు. ఎన్టీఆర్, హృతిక్ ఇద్దరి డాన్స్ యాక్టింగ్ అభిమానులను ఉర్రూతలూగించేలా ఉండనుందని టాక్. RRR లో ఎన్టీఆర్, రామ్ చరణ్ తో (Ram Charan) కలిసి చేసిన నాటు నాటు పాట అంతర్జాతీయ స్థాయిలో మంచి గుర్తింపు తెచ్చుకుంది.
ఇప్పుడు వార్ 2 లో హృతిక్ రోషన్ తో కలిసి స్టెప్పులేస్తున్న ఎన్టీఆర్ మరోసారి ప్రేక్షకులకు కిక్ ఇవ్వనున్నాడు. యశ్ రాజ్ ఫిల్మ్స్ బ్యానర్‌లో రూపొందుతున్న ఈ సినిమా వచ్చే ఏడాది ఆగస్టు 15న విడుదల కానుంది. పాన్ ఇండియా రేంజ్‌లో RRR తర్వాత ఎన్టీఆర్‌కి నార్త్‌ ఇండియాలో కూడా మంచి క్రేజ్ వచ్చింది. దేవర సినిమాతో ఈ క్రేజ్ రెట్టింపు అవుతుందని భావించినా, ఉత్తరాది ప్రేక్షకులను మాత్రం ఆశించిన మేర ఆకర్షించలేదు. అందుకే వార్ 2తో ఎన్టీఆర్ మరోసారి బాలీవుడ్‌ ప్రేక్షకులను ఆకట్టుకునేలా పూర్తి స్థాయిలో రెడీ అవుతున్నారు.
