తారక్ మాటలను ఎందుకు ఎడిట్ చేశారు?

ప్రముఖ టీవీ ఛానల్ మాటీవీ వాళ్లు చేసిన చిన్న పొరపాటు పెద్ద దుమారానికి దారి తీస్తోంది. కార్యక్రమంలో యంగ్ టైగర్ ఎన్టీఆర్ మాట్లాడిన మాటలను ఎడిట్ చేసి చర్చకు తెరలేపారు. ఈ విషయంపై  సోషల్ మీడియాలో ఎన్టీఆర్.. చిరు ఫ్యాన్స్ మిశ్రమంగా స్పందిస్తున్నారు. అసలు జరిగిన సంగతిలోకి వెళితే.. మాటీవీ వాళ్లు 2016 సినిమా అవార్డ్స్ కార్యక్రమాన్ని రెండు వారాలక్రితం నిర్వహించారు.

ఇందులో టెంపర్ సినిమాకు గాను ఉత్తమ నటుడిగా తారక్ అవార్డు అందుకున్నారు. మెగాస్టార్ చిరంజీవి, కింగ్ నాగార్జున చేతుల మీదుగా అవార్డు ను ఎన్టీఆర్ స్వీకరించారు. అనంతరం ఆయన మాట్లాడుతూ “ఎన్నేళ్లు గడిచినా మా తరం నటులకు చిరంజీవి, బాబాయ్ నాగార్జున, బాలకృష్ణ, వెంకటేష్, నందమూరి తారక రామారావు, అక్కినేని నాగేశ్వరరావు స్ఫూర్తిగా నిలుస్తారు” అని చెప్పారు. ఇదే విషయాన్ని కార్యక్రమం ప్రసారమయ్యే తేదీని చెబుతూ సాగే ప్రోమోలో మాటీవీ వారు చూపించారు. గత ఆదివారం ఈ ఫంక్షన్ ప్రసారమైంది. కానీ అందులో తారక్ మాటలు ప్రోమోలో చూపించనట్లుగా లేదు. “ఎన్నేళ్లు గడిచినా మా తరం నటులకు  నందమూరి తారక రామారావు, అక్కినేని నాగేశ్వరరావు, చిరంజీవి, బాబాయ్ నాగార్జున, బాలకృష్ణ, వెంకటేష్, స్ఫూర్తిగా నిలుస్తారు” అని ఉంది.

దీంతో షాక్ తిన్న కొందరు గత వీడియోని, ఇప్పటి వీడియోని పక్కన పెట్టుకుని చూసారు. ఎడిట్ చేసినట్లు కనుగొన్నారు. ఇదే విషయాన్ని సోషల్ మీడియా వేదికపై వెల్లడించారు. తారక్ మాటలను ఎందుకు ఎడిట్ చేయాల్సి వచ్చిందని ప్రశ్నించారు. ఇది ఫేస్ బుక్ లో వేగంగా షేర్లు అందుకుంది. దీనిపై మెగా అభిమానులు స్పందిస్తూ.. ” అభిమానులకు భయపడి తన మాటలు ఎన్టీఆర్ ఎడిట్ చేయించాడు” అని నిందించారు. “మాకు ఆ అవసరం ఏమి లేదని”  యంగ్ టైగర్ ఫ్యాన్స్ కామెంట్స్ పోస్ట్ చేశారు. ఎవరు, ఎందుకు ఎడిట్ చేశారు? అన్న సంగతి పక్కన పెడితే నేటి కాలంలో ఎవరిని చీట్ చేయలేమని, చిన్న తప్పుని కూడా కనిపెట్టెయ్యగలరని ఈ సంఘటన నిరూపించింది. ఇందుకు మాటీవీ వాళ్లు ఎలా వివరణ ఇచ్చుకుంటారో వేచి చూడాలి.