Akhil Akkineni : అఖిల్ ఇక పై అయ్యగారు కాదు.. ట్రెండింగ్ లోకి కొత్త పేరు.. ఏంటో తెలిస్తే ఆశ్చర్యపోతారు !

July 6, 2026 / 03:33 PM ISTByFilmy Focus Desk

Join Us

టాలీవుడ్ యువ హీరో అక్కినేని అఖిల్ ప్రస్తుతం తన తాజా చిత్రం ‘లెనిన్’ విడుదల కోసం జోరుగా ప్రమోషన్స్ నిర్వహిస్తున్నారు. జూలై 10న ప్రేక్షకుల ముందుకు రానున్న ఈ సినిమా ప్రీ-రిలీజ్ వేడుక తిరుపతిలో ఘనంగా జరిగింది. ఈ కార్యక్రమంలో సినీ ప్రముఖులతో పాటు భారీ సంఖ్యలో అభిమానులు పాల్గొనగా, ఒక అభిమాని చేసిన వ్యాఖ్యలు ఇప్పుడు సోషల్ మీడియాలో వైరల్‌గా మారాయి.

Akhil Akkineni

అఖిల్‌ను అభిమానులు చాలాకాలంగా సరదాగా “అయ్యగారు” అని పిలుస్తూ వస్తున్నారు. ఆ పేరు సోషల్ మీడియాలో మీమ్స్, ట్రెండ్స్ రూపంలో కూడా బాగా పాపులర్ అయింది. అయితే తాజాగా జరిగిన ఈవెంట్‌లో ఓ అభిమాని అఖిల్‌కు కొత్త పేరును సూచించడం అందరి దృష్టిని ఆకర్షించింది.

భద్రాచలం నుంచి వచ్చిన ఆ అభిమాని, ఇకపై అఖిల్‌ను “నాగ అఖిల్” అని పిలవాలని కోరాడు. ఈ పేరుకు కూడా ప్రత్యేకమైన అర్థాన్ని వివరించాడు. అక్కినేని కుటుంబ వారసత్వాన్ని గుర్తు చేసేలా ఈ పేరులో కుటుంబానికి చెందిన పలువురు ప్రముఖుల గుర్తింపు ప్రతిబింబిస్తుందని తన అభిప్రాయాన్ని వెల్లడించాడు. ఈ కొత్త పేరుతో అఖిల్ కెరీర్‌లో కొత్త అధ్యాయం ప్రారంభమవుతుందని, భవిష్యత్తులో వరుస విజయాలు అందుకుంటాడని ఆశాభావం వ్యక్తం చేశాడు.

అభిమాని చెప్పిన మాటలకు అక్కడున్న అభిమానుల నుంచి మంచి స్పందన లభించింది. ఆ వీడియోలు, ఫొటోలు సోషల్ మీడియాలో వైరల్ కావడంతో “నాగ అఖిల్” అనే పేరు కూడా నెట్టింట ట్రెండ్ అవుతోంది. అయితే దీనిపై అఖిల్ అధికారికంగా ఎలాంటి స్పందన ఇవ్వలేదు.ఇక ‘లెనిన్’ సినిమా విషయానికి వస్తే, దర్శకుడు మురళీ కిషోర్ అబ్బూరి తెరకెక్కించిన ఈ చిత్రంలో భాగ్యశ్రీ బోర్సే హీరోయిన్‌గా నటిస్తున్నారు. అన్నపూర్ణ స్టూడియోస్, సితార ఎంటర్‌టైన్‌మెంట్స్ సంయుక్తంగా నిర్మించిన ఈ చిత్రం గ్రామీణ నేపథ్యంతో యాక్షన్, ఎమోషన్ అంశాల మేళవింపుగా రూపొందింది. ‘ఏజెంట్’ తర్వాత అఖిల్ నటిస్తున్న ఈ సినిమాపై అభిమానుల్లో మంచి అంచనాలు నెలకొన్నాయి. ‘లెనిన్’ మూవీ అఖిల్‌కు బాక్సాఫీస్ వద్ద విజయాన్ని అందిస్తుందా లేదా అనే ఆసక్తి సినీ వర్గాల్లో కనిపిస్తోంది.