ఆ హీరోయిన్ కావాలని పట్టుబట్టి మరీ సెలక్ట్ చేయించాడు

ఒక ఇంట్లో ఇద్దరు అన్నదమ్ములు ఉంటే.. తల్లిదండ్రులు చిన్నోడికి పెద్దోడు వాడిన వస్తువులను ఇస్తేనే తీసుకోవడానికి తెగ గొడవ పెడుతుంటారు. కానీ.. అఖిల్ & నాగచైతన్యలకు ఈ విషయంలో మంచి బాండింగ్ ఉన్నట్లుంది. “మిస్టర్ మజ్ను” టైమ్ లో అఖిల్ కి చాలామంది హీరోయిన్స్ ఆప్షన్ ఉన్నప్పటికీ.. మనోడు కావాలని నాగచైతన్యతో నటించిన నిధి అగర్వాల్ ను సెలక్ట్ చేసుకొన్నాడు. టాలీవుడ్ ఎంట్రీలోనే ఇద్దరు అన్నదమ్ములతో నటించి నిధి కొత్త రికార్డ్ క్రియేట్ చేసిందనుకోండి.

ఇప్పుడు తన నాలుగో సినిమాగా బొమ్మరిల్లు భాస్కర్ దర్శకత్వంలో తెరకెక్కుతున్న చిత్రంలో హీరోయిన్ ఇప్పటివరకు ఫైనల్ అవ్వలేదు. మధ్యలో కైరా, రష్మికల పేర్లు వినిపించినప్పటికీ.. ఏదీ ఫైనల్ అవ్వలేదు. తాజా సమాచారం మేరకు అన్నయ్య నాగచైతన్య సరసన “ఒక లైలా కోసం”లో నటించి టాలీవుడ్ కి పరిచయమైన పూజా హెగ్డే కావాలని పట్టుబట్టాడట. నిజానికి మీడియం బడ్జెట్ తో తెరకెక్కుతున్న ఈ సినిమాకి పూజా హెగ్డే లాంటి హీరోయిన్ ను సైన్ చేసే అవకాశం లేకపోయినప్పటికీ.. అఖిల్ అభీష్టం మేరకు అల్లు అరవింద్ ఒకే చేశాడట. మరి అన్నయ్య హీరోయిన్ ఈసారైనా అఖిల్ కి వర్కవుట్ అవుతుందో లేదో చూడాలి.