Dస్టార్‌ కిడ్‌, నెపో కిడ్‌, వంశం పేరు చెప్పుకొని బతికేస్తున్నాడు, తాత పేరుతో మేనేజ్‌ చేసేస్తున్నాడు.. ఇలా ఒక్కటా రెండా మాటలొచ్చిన ప్రతి వ్యక్తి ఆయన్ను అనినవాడే. నిజానికి స్టార్‌ హీరోలు, నటుల వారసులు, ఇండస్ట్రీకి చెందిన వారిని పిల్లలకు ఈ మాటలు కామన్‌ అయిపోయాయి. పరిశ్రమలోనే ఉన్నవాళ్లే అంటుంటారు కూడా. అయితే ఈ అవసరంలేని ఉపమానాల వెనుక తెలియని బండంత బరువు కూడా ఉంటుంది. ఆ బరువును మోస్తూ నడవడమే కష్టం అనుకుంటే.. ఏకంగా మారథాన్‌ పరుగు పెడుతున్నాడు యంగ్‌ టైగర్‌ ఎన్టీఆర్. ఈ రోజు ఆయన పుట్టిన రోజు సందర్భంగా ఓసారి లైఫ్‌ను రివైండ్‌ చేసుకుందామా.
తారక్‌ (Jr NTR) సినిమాల గురించి మాట్లాడటానికి ముందు ఆయన ఫిట్‌నెస్‌ గురించి మాట్లాడాలి. దీనికి సింగిల్‌ లైన్‌లో ఆన్సర్‌ కావాలి అంటే టైటిల్‌లో చెప్పినట్లు ‘సున్నుండ టు సూపర్‌ మిసైల్‌’ అని చెప్పొచ్చు. కావాలంటే మీరే చూడండి తొలి సినిమా ‘నిన్ను చూడాలని’ (Ninnu Choodalani) నుండి ఇప్పుడు ‘డ్రాగన్‌’ (రూమర్డ్‌ టైటిల్) (Dragon) వరకు ఆయన లుక్స్‌ చెక్‌ చేసుకోండి. ఇక్కడ సున్నుండ అని మేం అన్నాం అనుకునేరు. ‘ఆది’ (Aadi) సినిమాలో ఆయన్ను హీరోయినే అలా పిలిచింది. అప్పట్లో అలానే ఉండేవాడు లెండి. ఇప్పుడు సన్నగా అదేదో 20 – 25 కుర్రాడిలా మారిపోయాడు.
‘రాఖీ’ (Rakhi) సినిమా నుండి ‘యమదొంగ’ (Yamadonga) సినిమా సమయానికి వచ్చేసరికి ఆయన హఠాత్తుగా తగ్గిపోయాడు. దీని వెనుక చాలా చర్చలు ఉన్నా.. ఆయన అలా తగ్గి ఎంతోమందికి స్ఫూర్తినిచ్చాడు. అంతేకాదు అలా తగ్గినవాళ్లు కొనసాగడం చాలా గ్రేట్‌ అంటుంటారు. ఆ పని చేసి తాను గ్రేట్‌ అనిపించుకున్నాడు తారక్‌. ‘దేవర’ (Devara) సినిమా కోసం కాస్త లావెక్కిన తారక్‌.. మళ్లీ ఇప్పుడు ‘డ్రాగన్‌’ కోసం సన్నని రివటలా మారిపోయాడు. ఈ ఫిట్‌నెస్‌ జర్నీ ఎందరికో పాఠం. తనను విమర్శించిన వాళ్లకు గుణపాఠం.
తారక్‌ గురించి చెబుతూ.. తన వైవిధ్యమైన సినిమాల ఎంపిక గురించి మాట్లాడకపోతే అస్సలు బాగోదు. టాలీవుడ్‌లో ఓ యంగ్‌ హీరో తొలి నాళ్లలో చేయడానికి ముందుకురాని ఎన్నో పాత్రలు చేశాడు. ‘ఆది’ సినిమాలో వయసు మించిన పాత్ర బరువు మోశాడు. అప్పట్లో ఫ్యాక్షన్‌ బేస్డ్‌ సినిమా అంటే ‘సీనియర్ హీరో’నే చేయాలి అనుకునేవారు. కానీ తానూ చేసి చూపించాడు. లవర్‌ బాయ్‌ ఇమేజ్‌ కావాలని యంగ్‌ హీరోలు అనుకునే రోజుల్లో ‘సింహాద్రి’ (Simhadri), ‘ఆంధ్రావాలా’, (Andhrawala) ‘సాంబ’ (Sambha), ‘నరసింహుడు’ (Narasimhudu), ‘రాఖీ’, ‘కంత్రీ’ (Kantri) అంటూ యాక్షన్‌ మోడ్‌లో కత్తి మీద సాము చేశాడు. విజయం సాధించాడు కూడా.
ఎవరైనా దర్శకుడు తారక్‌లో ఉన్న కామెడీని బయటకు తీస్తే బాగుండు అని చాలామంది అభిమానులు అనుకుంటుండగా.. అప్పుడు పడింది ‘అదుర్స్‌’ (Adhurs). ఇప్పటికీ ఆ జోనర్‌లో హీరో పాత్ర ఎవరైనా చేస్తున్నారు అంటే ‘అదుర్స్‌’ ఓ బెంచ్‌ మార్క్‌ అయిపోయింది. ప్రతినాయక లక్షణాలు ఉన్న హీరో పాత్ర చేయడానికి ముందుకు రాని హీరోలు ఉన్న ఈ రోజుల్లో రెండుసార్లు అలా నటించి వావ్‌ అనిపించాడు. ఒకటి ‘టెంపర్‌’ (Temper) అయితే.. రెండోది ‘జై లవకుశ’ (Jai Lava Kusa). ఈ రెండు సినిమాల్లో తారక్‌ చూపించే యాటిట్యూడ్‌కి సపరేట్‌ ఫ్యాన్‌ బేస్‌ ఉంది అంటే అతిశయోక్తి కాదు.
ఇక ‘ఆర్‌ఆర్‌ఆర్‌’ (RRR) సినిమాలో నటన గురించి మాట్లాడుకోకపోతే ఎలా చెప్పండి. భీమ్‌గా తారక్‌ తనను తాను తెరపై చూపించుకున్న విధానం నభూతో నభిష్యతి. కొన్నిసార్లు తన పాత్ర అండర్‌ ప్లే అయినా.. తన ఛాన్స్‌ వచ్చినప్పుడు స్క్రీన్‌ మొత్తం తానే కనిపించాడు. స్క్రీన్‌ ప్రజెన్స్‌ విషయంలో నేటి తరం హీరోల్లో తనను మించినవాళ్లు లేరు అంటే తప్పు కాదేమో. ఇక్కడ ప్రస్తావించని సినిమాలు చాలానే ఉన్నాయి. అలా అని అవి హిట్‌ కావు అని కాదు.. అన్నీ చెబితే సినిమాల లిస్టే అవుతుందని.
30 సినిమాలకు చేరుకున్న తారక్‌ లాంగ్‌ మారథాన్‌లో అన్నీ విజయాలే లేవు. కొన్ని కోలుకోలేని పరాజయాలూ ఉన్నాయి. అయితే వాటి నుండి తేరుకొని, కోలుకొని తిరిగి పైకి లేచిన తారక్‌ పరుగు ఇంకొన్నాళ్లు ఇలానే కొనసాగాలని ఆశిద్దాం. ఇప్పుడు తారక్‌ చేతిలో ఉన్న మూడు సినిమాలు ‘దేవర 2’, ‘డ్రాగన్‌’, ‘వార్‌ 2’ అతనిని మరో ఎత్తులో నిలుపుతాయి అనడంలో ఎలాంటి సందేహం లేదు. ఇదంతా ఎందుకు చెబుతున్నామో తెలుసు కదా. హ్యాపీ బర్త్‌డే టాలీవుడ్‌ మిసైల్‌ తారక్‌.
