ఆలూ లేదు, చూలూ లేదు.. కొడుకు పేరు సోమలింగం.. అన్న చందాన టాలీవుడ్లో ఒక్కోసారి రూమర్లు వచ్చేస్తుంటాయి. కొత్త విషయం అవ్వడం, అందరికీ తెలిసే అవకాశం లేకపోవడంతో ఆ పుకార్లు రుచి భలేగా ఉంటుంది. అలాంటి కొన్ని పుకార్లు ఇప్పుడు అనిల్ రావిపూడి సినిమా విషయంలో జరుగుతున్నాయి. ‘మన శంకరవరప్రసాద్ గారు’ సినిమాతో కెరీర్లో అత్యధిక వసూళ్లు అందుకున్నారు అనిల్. దీంతో నెక్స్ట్ సినిమా ఏంటి? ఎవరితో చేస్తారు? ఎలా ఉండొచ్చు అనే చర్చలు మొదలయ్యాయి.
ఈ ప్రశ్నలకు ఇప్పటికే ఆయన సమాధాననమిస్తూ.. ఇంకా ఎలాంటి నిర్ణయమూ తీసుకోలేదు అని చెప్పారు. అయినా పుకార్లు మాత్రం జోరుగా సాగుతున్నాయి. సినిమా కథ నేపథ్యం, టైటిల్, హీరోయిన్లు, ముఖ్య నటులు, రిలీజ్ డేట్లు, ట్విస్ట్లు, టర్న్లు, ప్లాట్లు బయటకు వచ్చేశాయి. అందులో సంక్రాంతికి రిలీజ్ ఒక్కటే కరెక్ట్. ఎందుకంటే ఆ విషయం ఆయనే చెప్పారు. అయితే ఆ మాటతో పేరు చాలా విషయాలు వైరల్ చేసేస్తున్నారు. దీనిపై ఆయనే ఇటీవల ఓ ట్వీట్ చేశారు. రూమర్ క్రియేటర్లపై తనదైన శైలిలో కౌంటర్ ఇచ్చారు.
నేను కాగితం మీద కలం కూడా ఇంకా ట్టలేదు. కానీ, నటీనటులు, కథ, టైటిల్ను కొంతమంది పెట్టేశారు. ఈ ఫ్లో చూస్తుంటే యాక్షన్.. కట్ కూడా చెప్పేస్తారేమో. మీ ఉత్సాహాన్ని నేను అర్థం చేసుకోగలను. నేను చేసే సినిమా ఏంటి? ఎవరితో అనేది అతి త్వరలోనే చెబుతాను అని ఆ పోస్టులో రాసుకొచ్చారు అనిల్ రావిపూడి.
ఈ సినిమాలో ఓ కీలక పాత్ర కోసం మలయాళ నటుడు ఫహాద్ ఫాజిల్ను అడిగే ఆలోచనలో ఉన్నారంటూ టాలీవుడ్ వర్గాల్లో చర్చ సాగుతోంది. ఈ సినిమాలో కీర్తి సురేశ్, పూజా హెగ్డేను హీరోయిన్లుగా తీసుకుంటారని కూడా చెప్పారు. అంతేకాదు ఈ సినిమా ‘బావ బావమరిది’ టైప్ కథతో రూపొందుతుంది అని కూడా వార్తలొచ్చాయి. అలాగే సినిమా ‘శ్రీమతి లలితా రెడ్డి’ అనే పేరు కూడా పెడతారని రూమర్లు వినిపించాయి. అనిల్ పోస్టు నేపథ్యంలో ఇకనైనా ఈ పుకార్లు ఆగుతాయేమో చూడాలి.
