మన సీనియర్‌ స్టార్ హీరోల సినిమాల్లో హీరోకు తోడుగా మరో హీరో ఉండాలా? ఏమో గత కొన్ని రోజులుగా సీనియర్‌ స్టార్ హీరోల సినిమాల కబుర్లు వింటుంటే ఇలానే అనిపిస్తోంది. అయితే ఆ రెండో హీరో అంత సీనియర్‌ అయి ఉండరు అనుకోండి. తాజాగా ఇలా ‘సినిమాలో ఇంకో హీరో’ అనే మాట వినిపిస్తున్న చిత్రం ‘సైంధవ్‌’. వెంకటేశ్‌ 50వ సినిమాగా రూపొందుతున్న ఈ చిత్రంలో మరో హీరోకు ఛాన్స్‌ ఉందని సమాచారం. ఈ మేరకు ఎంపిక కూడా జరిగిపోయింది అని అంటున్నారు.
శైలేష్‌ కొలను దర్శకత్వంలో త్వరలో ‘సైంధవ్‌’గా సందడి చేయడానికి వెంకటేష్ సిద్ధమవుతున్నారు. ఈ సినిమా బాలీవుడ్ స్టార్ యాక్టర్‌ నవాజుద్దీన్‌ సిద్ధిఖీ ముఖ్య పాత్ర పోషిస్తున్న విషయం తెలిసిందే. ఇటీవలే లాంఛనంగా ప్రారంభమైన ఈ సినిమా గురించి మరో విషయం తెలిసిందే. అదే ఈ సినిమాలో మరో స్టార్ హీరోను రంగంలోకి దించేందుకు చిత్ర బృందం సిద్ధమైందట. తమిళంతో పాటు తెలుగులోనూ క్రేజ్‌ ఉన్న హీరో ఆర్యను ఈ సినిమాలో నటింపజేసేందుకు ప్రయత్నాలు చేస్తున్నారట.
‘సైంధవ్‌’లో ఓ కీలక పాత్ర ఉందని, అది సినిమా కీలక సమయంలో వస్తుందని సమాచారం. దీని కోసం ఎవరు బాగుంటారా అని చూస్తే.. ఆర్య పేరు అనిపించిందని చెబుతున్నారు. ఆ పాత్ర చాలా శక్తివంతంగా ఉంటుందని కూడా చెబుతున్నారు. మార్చి నెలాఖరు లేదా ఏప్రిల్‌ తొలి వారం నుండి ఈ సినిమా రెగ్యులర్‌ ప్రారంభమవుతుందని సమాచారం. పాన్‌ ఇండియా సినిమా కాబట్టి ఇతర పరిశ్రమల నుండి యాక్టర్లను తీసుకొస్తున్నారని కూడా కామెంట్స్‌ వస్తున్నాయి.
ఇక వెంకటేష్ కెరీర్‌లో అత్యంత భారీ బడ్జెట్‌తో రూపొందుతున్న చిత్రమిది. యాక్షన్‌ ఎంటర్‌టైనర్‌గా రూపొందుతోన్న ఈ సినిమా సౌత్ లాంగ్వేజ్‌తోపాటు హిందీలోనూ విడుదల చేస్తారు. కథ విషయంలో ఇప్పటివరకు క్లారిటీ లేకపోయినా.. పేరు, పోస్టర్‌, లుక్‌ చూస్తే మాత్రం వెంకీ కెరీర్‌లో ఇదొక స్పెషల్‌ ఫిల్మ్‌గా నిలిచిపోతుందని అంచనా వేస్తున్నారు.
Home