యంగ్ టైగర్ ఎన్టీఆర్ తాజా బ్లాక్ బస్టర్ చిత్రం జనతా గ్యారేజ్ పై అనుపమ పరమేశ్వరన్ సంచలన కామెంట్స్ చేసింది. తారక్ సినిమానే కామెంట్ చేసిన ఈమె ఎవరు అని అనుకుంటున్నారా ? అయితే వివరాల్లోకి వెళ్దాం.. అనుపమ మలయాళ నటి. ఆమె తొలి సారి మలయాళ సినిమా ‘ప్రేమమ్’ లో మేరి జార్జ్ గా కనిపించి యువకుల మనసు దోచుకుంది. త్రివిక్రమ్ శ్రీనివాస్ దర్శకత్వంలో తెరకెక్కిన “అ..ఆ” మూవీ ద్వారా తెలుగు వారికి పరిచయమైంది. అందులో నెగిటివ్ షేడ్స్ ఉన్న నాగవల్లిగా నటించి, తన పాత్రకు సొంతంగా డబ్బింగ్ చెప్పుకుని మెప్పించింది.
ఇప్పుడు మలయాళ చిత్రం ప్రేమమ్ కు రీమేక్ అయిన తెలుగు ప్రేమమ్ లో సుమ గా అలరించడానికి సిద్ధమైంది. యువసామ్రాట్ అక్కినేని నాగ చైతన్య హీరోగా నటించిన ఈ చిత్రం శుక్రవారం విడుదల కానుంది. ఈ సందర్భంగా ఆమె మూవీ ప్రచార కార్యక్రమంలో పాల్గొంటూ పలు ఆసక్తికర విషయాలు వెల్లడించింది. తెలుగు సినిమాలలో నటించాలని కోరిక ఉన్న తాను ఈ మధ్య ఎక్కువగా సినిమాలు చూస్తున్నట్లు చెప్పింది. అందులో భాగంగా ‘జనతా గ్యారేజ్’ మూవీని చూశానని, అయితే అందులో డైలాగులు అర్ధం కాక పోవడంతో ఎంజాయ్ చేయ‌లేక‌పోయాన‌ని వివరించింది. ప్రస్తుతం శతమానం భవతి సినిమాలో శర్వానంద్ కి జోడీ గా నటిస్తున్న ఈ కేరళ కుట్టి త్వరలో టాలీవుడ్ లో టాప్ హీరోయిన్ల జాబితాలో చేరేలా ఉంది.
