“సర్దార్ గబ్బర్ సింగ్, కాటమరాయుడు” లాంటి ఫ్లాప్స్ తర్వాత పవన్ కళ్యాణ్ నుంచి వస్తున్న సినిమా కావడంతో ఒక సూపర్ హిట్ కొట్టాలన్న ధ్యేయంతో త్రివిక్రమ్ ఎంతో కష్టపడి ఈ చిత్రాన్ని తెరకెక్కిస్తున్నాడు. ఇప్పటికే విడుదలైన పాట, పోస్టర్ అండ్ టైటిల్ కి అద్భుతమైన స్పందన లభించింది. సంక్రాంతి కానుకగా జనవరి 10న విడుదలవుతున్న ఈ చిత్రంపై భారీ అంచనాలున్నాయి. పండగ సీజన్ మాత్రమే కాక హాలీడే సీజన్ కూడా అయిన సంక్రాంతికి సినిమా రానుండడం, అది కూడా ఆల్రెడీ పవన్ కళ్యాణ్ కి “జల్సా, అత్తారింటికి దారేది” లాంటి సూపర్ హిట్స్ ఇచ్చిన త్రివిక్రమ్ దర్శకుడు కావడంతో “అజ్ణాతవాసి” బ్లాక్ బస్టర్ అవ్వడంలో డౌట్ లేదని పవన్ అభిమానులు పూర్తి నమ్మకం మీదున్నారు.
ఇప్పుడు ఆ నమ్మకానికి “టికెట్ రేట్” పెరుగుదల కూడా తొడవ్వడంతో “బాహుబలి” ఆంధ్ర-తెలంగాణ రికార్డ్స్ ను బ్రేక్ చేసే అవకాశాలు పుష్కలంగా ఉన్నాయి. తాజా టికెట్ హైక్ ప్రకారం మొదటి పదోరోజులపాటు సింగిల్ స్క్రీన్స్ 200 రూపాయలు, మల్టీప్లెక్స్ లు 250 రూపాయల వరకూ రేటు పెంచవచ్చని గవర్నమెంట్ అధికారం ఇవ్వడంతో.. ఫస్ట్ వీక్ కలెక్షన్స్ విషయంలో “అజ్ణాతవాసి” సంచలనాలు సృష్టించడం ఖాయం.
పవన్ కళ్యాణ్ సరసన కీర్తి సురేష్, అను ఎమ్మాన్యూల్ కథానాయికలుగా నటిస్తున్న ఈ చిత్రాన్ని హారిక & హాసిని క్రియేషన్స్ పతాకంపై రాధాకృష్ణ నిర్మిస్తున్నారు.
