మెగాడాటర్ గా టాలీవుడ్ కి.. మూడేళ్ళ క్రితమే ఎంట్రీ ఇచ్చింది నిహారిక. ఆరంభంలోనే చాలా విమర్శలు ఎదుర్కొంది ఈ అమ్మడు. మెగాభిమానులు ఆమెను హీరోయిన్ గా పరిచయం చేయొద్దని.. నాగబాబుని కూడా కోరారట. అయినప్పటికీ నీహారిక ‘ఒక మనసు’ చిత్రంతో హీరోయిన్ గా గ్రాండ్ ఎంట్రీ ఇచ్చింది. అయితే ఆ సినిమా హిట్టవ్వక పోగా.. నిహారిక కి పెద్దగా అవకాశాలు రావడానికి కూడా ఉపయోగపడలేదు. దీంతో ఎప్పుడో షెడ్డుకెల్లిపోయిన సుమంత్ అశ్విన్ తో ‘హ్యాపీ వెడ్డింగ్’ అనే చిత్రంలో హీరోయిన్ గా నటించింది. ఈ చిత్రానికి సొంతంగా ఓ రేంజ్లో ప్రమోషన్ చేసుకుంది. అయినప్పటికీ హిట్టు మాత్రం సాధించలేకపోయింది.
ఇక తాజాగా నిహారికా నటిస్తున్న ‘సూర్యకాంతం’ చిత్ర పరిస్థితి ఇంకా ఘోరంగా తయారయ్యింది. ఈ చిత్రానికి ప్రీ రిలీజ్ బిజినెస్ జరగడం చాలా కష్టమయ్యింది. టీజర్ చూడ్డానికి ‘వెబ్ సిరీస్’ మాదిరిగా ఉండడంతో.. ఈ చిత్రాన్ని కొనుక్కోవడానికి బయ్యర్లు ముందుకు రాకపోవడం గమనార్హం. మొదట ఈ చిత్రాన్ని మార్చి 29న విడుదల చేయాల‌ని భావించినప్పటికీ.. ప్రీ రిలీజ్ బిజినెస్ మాత్రం పూర్తవ్వలేదు. ఈ క్రమంలో ‘నిర్వాణ సినిమాస్’ సంస్థ సొంతంగా ఈ చిత్రాన్ని రిలీజ్ చేసుకోవాల్సిన పరిస్థితి ఏర్పడింది. ఇక మెగా కాంపౌండ్ లో అల్లు శిరీష్ కి కూడా దాదాపు ఇదే పరిస్థితి ఏర్పడింది. శిరీష్ కెరీర్లో ఓ రెండు హిట్లున్నా… తన తాజా చిత్రం ‘ఎబిసిడి’ చిత్రానికి బయ్యర్లు ముందుకు రావట్లేదట. దీంతో ఈ చిత్రం ఎప్పుడు రిలీజ‌వుతుందో తెలియ‌ని పరిస్థితి ఏర్పడింది. మొదట ఈ చిత్రాన్ని ఫిబ్ర‌వ‌రి 8 న విడుదల చేయాలనుకున్నారు కానీ.. తరువాత మార్చి 1కి మార్చారని చెప్పుకొచ్చారు ఇప్పుడు మార్చి 22 అంటున్నారట. మరి ఈ చిత్రం ఎప్పుడు రిలీజ్ అవుతుందనేది పెద్ద ప్రశ్నగా మిగిలింది. మెగా ఫ్యామిలిలో మిగిలిన వారందరూ దూసుకెళ్ళిపోతుంటే.. నిహారిక, శిరీష్ లకు మాత్రం మెగా అభిమానులు మొహం చాటేస్తున్నారు. మరి చివరికి ఏం జరుగుతుందో చూడాలి.
