భారతీయ సినీ జనాల హృదయాల్లో సుస్థిర స్థానం దక్కించున్న నటి శ్రీదేవి. ఆమె కూతురు నటిగా పరిచయం అవుతుందంటే సాధారణంగానే క్రేజ్ ఉంటుంది. అంతేకాకుండా మరాఠిలో సూపర్ హిట్ అయిన సైరట్ మూవీ రీమేక్ అయ్యేసరికి మరింత హైప్ వచ్చింది. శశాంక్ దర్శకత్వంలో తెరకెక్కిన దఢక్ మూవీ నేడు రిలీజ్ అయింది. ఈ సినిమాని చూసిన ప్రతి ఒక్కరూ జాన్విలో శ్రీదేవిని చూసుకుంటున్నారు. బాలీవుడ్ సెలబిటీలు అయితే జాన్వి పై ప్రశంసల జల్లు కురిపిస్తున్నారు. “జాన్వి.. నిన్ను చూస్తుంటే నోట మాట రావడం లేదు. చాలా గర్వంగా ఉంది. ఇషాన్ అదరగొట్టేశాడు. శశాంక్ అద్భుతంగా సినిమాను తెరకెక్కించారు” అని హీరో అర్జున్ కపూర్ ట్వీట్ చేశారు.
“ధడక్‌` సినిమా చూశాక నా మనసు ఎమోషన్‌తో నిండిపోయింది. జాన్వి, ఇషాన్ చిన్న తప్పు కూడా చేయలేదు. ఎంతో అనుభవమున్నవారిలా నటించారు” అని హీరోయిన్ నేహా ధూపియా ట్విట్టర్లో పోస్ట్ చేశారు. వీళ్ళే కాదు మాధురీ దీక్షిత్‌, వరుణ్ ధావన్‌, అనిల్ కపూర్, దియా మిర్జా తదితరులు కూడా ట్విటర్ ద్వారా చిత్రబృందానికి శుభాకాంక్షలు తెలియజేశారు. ఈ మూవీ భారీ ఓపెనింగ్స్ రాబట్టిందని ట్రేడ్ వర్గాలవారు తెలిపారు. అందరూ కొత్తవారు అయినప్పటికీ స్టార్ హీరోల చిత్రాలకు పోటీగా థియేటర్లు నిండిపోతున్నాయని వెల్లడించారు. ఈ కలక్షన్స్ లెక్కలు సాయంత్రానికి బయటికి రానున్నాయి.
