నిఖిల్ తో నేను నటించడం లేదు!

“కిర్రాక్ పార్టీ” అనంతరం తమిళ సూపర్ హిట్ చిత్రం “కనితన్”లో నటించేందుకు యువ కథానాయకుడు నిఖిల్ సన్నద్ధమవుతున్న విషయం తెలిసిందే. ఠాగూర్ మధు నిర్మించనున్న ఈ చిత్రం తెలుగు వెర్షన్ కి తమిళ వెర్షన్ డైరెక్టర్ శివ దర్శకత్వం వహించనున్నాడు. అయితే.. ఈ చిత్రంలో కథానాయికగా తమిళనాట హీరోయిన్ గా నటించిన కేతరీన్ కనువిందు చేయనుందని గత కొన్ని నెలలుగా వార్తలు వెలువడుతున్నాయి. కానీ.. ఆ సినిమాలో నేను నటించడం లేదు అని కేతరీన్ మొత్తుకొంటోంది.

ఇటీవల జీవా సరసన ఒక తమిళ చిత్రంలో నటించిన కేతరీన్ తాజాగా తమిళంలో జై (“జర్నీ” ఫేమ్) సరసన మరో సినిమా సైన్ చేసింది. ఇలా వరుస తమిళ చిత్రాలతో బిజీగా ఉన్న తాను తెలుగులో నిఖిల్ సరసన నటిస్తున్నానంటూ వస్తున్న వార్తల్లో ఏమాత్రం నిజం లేదని కేతరీన్ చెబుతోంది. అలాగే.. తెలుగులో రవితేజ సరసన నటించాల్సి ఉన్నప్పటికీ.. ఆ ప్రొజెక్ట్ ఆఖరి నిమిషంలో క్యాన్సిల్ అయ్యిందని త్వరలోనే మరో సినిమాలో రవితేజతో నటించనున్నానని కూడా ఆమె పేర్కొనడం విశేషం.