విజయ్ దేవరకొండ ను డైరక్ట్ చేయనున్న బాబీ!

మాస్ మహారాజా రవితేజ తో పవర్ వంటి బ్లాక్ బస్టర్ హిట్ తో ఎంట్రీ ఇచ్చిన డైరక్టర్ బాబీ.. ఆ తర్వాత పవన్ కళ్యాణ్ తో సినిమా చేసే అవకాశం దక్కించుకున్నారు. వీరి కలయికలో వచ్చిన సర్ధార్ గబ్బర్ సింగ్ నిరాశపరిచింది. దీంతో మళ్ళీ తన ప్రతిభ ని నిరూపించుకోవాల్సిన అవసరం ఏర్పడింది. ఈ సారి యంగ్ టైగర్ ఎన్టీఆర్ తో జై లవ కుశ సినిమా తీశారు. అద్భుత విజయం అందుకున్నారు. జై లవకుశ తర్వాత బాబీ ఏ స్టార్ హీరోతో సినిమా తీస్తారా? అని అందరూ ఆసక్తిగా ఎదురు చూసారు. కానీ అతను స్టార్ హీరోని కాకుండా యువ హీరోని సెలక్ట్ చేశారని ఫిలిం నగర్ వాసులు చెబుతున్నారు.

అర్జున్ రెడ్డి సినిమాతో తెలంగాణ పవర్ స్టార్ గా పేరు తెచ్చుకున్న విజయ్ దేవరకొండతో సినిమా చేయనున్నట్లు తెలిసింది. విజయ్ చేతిలో ప్రస్తుతం నాలుగు సినిమాలు ఉన్నాయి. ఆ సినిమా షూటింగ్ లో బిజీగా ఉన్నప్పటికీ బాబీ కథ విన్నారు. నచ్చడంతో వెంటనే ఒకే చెప్పారని సమాచారం. ఆ కథను డెవలప్ చేసే పని బాబీ పడ్డారు. ఈ స్క్రిప్ట్ పూర్తి అయిన తర్వాత ఈ మూవీ గురించి అధికారిక ప్రకటన రానుంది.