సుకుమార్, సూపర్ స్టార్ మహేష్ బాబు కలయికలో వచ్చిన వన్ నేనొక్కడినే సినిమా ఆశించిన ఫలితాలను అందుకోలేకపోయింది. హాలీవుడ్ సినిమాలా ఉందని సినీ విశ్లేషకులు ప్రశంసించినప్పటికీ బాక్స్ ఆఫీస్ వద్ద బోల్తా కొట్టింది. ఈసారి ఎలాగైనా మహేష్ తో హిట్ కొట్టాలని సుకుమార్ పట్టుదలతో ఉన్నారు. రంగస్థలం మూవీ సూపర్ హిట్ కావడంతో అదే జోనర్ లో అలనాటి మరో కథని మహేష్ కి వినిపించారు. ఆ కథ బాగున్నప్పటికీ మహేష్ నిర్మొహమాటంగా నో చెప్పారు. పాతకాలం నాటి కథలు వద్దని స్పష్టం చేశారు. తాజాగా వినిపించిన కొత్త లైన్ కి మహేష్ ఒకే చెప్పడంతో సుకుమార్ రంగంలోకి దిగిపోయారు.
స్క్రిప్ట్ పనులతో పాటు టెక్నీషియన్లను, ఆర్టిస్టులను ఫిక్స్ చేస్తున్నారు. మైత్రీ మూవీ మేకర్స్ వారు ఈ సినిమాకి 150 కోట్ల బడ్జెట్ ని కేటాయించినట్లు తెలిసింది. ఎక్కువమంది హాలీవుడ్ నిపుణులు చిత్ర బృందంలో భాగం అవుతుండడం వల్ల ఈ మూవీ బడ్జెట్ (అంచనా) వందకోట్లు దాటిందని ఫిల్మ్ నగర్ వాసులు చెప్పారు. దీంతో ఈ మూవీ బడ్జెట్ గురించి అందరూ మాట్లాడుకుంటున్నారు. ప్రస్తుతం వంశీ పైడిపల్లి దర్శకత్వంలో మహేష్ మహర్షి అనే సినిమా చేస్తున్నారు. అశ్వినీదత్, దిల్ రాజు, పీవీపీ కలిసి నిర్మిస్తున్న ఈ మూవీ షూటింగ్ వేగంగా సాగుతోంది. పూజా హెగ్డే హీరోయిన్ గా నటిస్తున్న ఈ సినిమా ఏప్రిల్ 5 న రిలీజ్ కానుంది. ఆ తర్వాత సుకుమార్ కి మహేష్ డేట్స్ కేటాయించనున్నారు.
Home