చైతూ సినిమా కావాలంటున్న ఆది!

ఒక హీరో చేసిన సినిమా చూసి “నాకు అలాంటి సినిమా చేయాలనుంది లేదా చేయాలనుకొంటున్నాను” అని మన యువ కథనాయాకులు అప్పుడప్పుడూ చెప్పడం మనం చూస్తూనే ఉంటాం. అయితే.. హీరో ఆది ఇంకో అడుగు ముందుకేసి అక్కినేని నాగచైతన్య కోసం వచ్చిన ఓ తమిళ రీమేక్ ఆఫర్ ను తన మరియు తన తండ్రి కాంటాక్ట్స్ మొత్తం ఉపయోగించి సదరు ఆఫర్ ను సొంతం చేసుకొన్నాడు.

తమిళంలో ఘన విజయం సాధించిన “ఎట్టి” చిత్రం తెలుగు రీమేక్ లో నటించే అవకాశం తొలుత నాగచైతన్యను వెతుక్కుంటూ వచ్చినప్పటికీ.. చైతూ కాస్త బిజీగా ఉండడంతో “తర్వాత చేద్దాం” అన్నాడట. అదే సమయంలో “చుట్టాలబ్బాయ్”తో సెకండ్ హ్యాట్రిక్ ఫ్లాప్ అందుకొన్న ఆది కన్ను ఈ రీమేక్ పై పడింది. వెంటనే తండ్రి సాయికుమార్ దగ్గర నానా మారాం చేసి.. “ఎట్టి” రీమేక్ లో నటించే అవకాశం సొంతం చేసుకొన్నాడు. ఓ వింత వ్యాధి ఉన్న అథ్లెట్ జీవితం నేపధ్యంలో తెరకెక్కిన ఈ చిత్రానికి తమిళంలో అవార్డ్స్ తోపాటు భారీ రివార్డులు కూడా తీసుకువచ్చింది. మరి ఈ డిఫరెంట్ కాన్సెప్ట్ ఫిలిమ్ తోనైనా ఆది విజయాన్ని రుచి చూస్తాడేమో చూడాలి.