Nadigar Sangam: నడిగర్‌ సంఘం వ్యవహారం.. రాష్ట్ర ప్రభుత్వాన్ని అడిగిన హైకోర్టు.. ఏమైందంటే?

తమిళనాడు నటీనటుల అసోసియేషన్‌ అలియాస్‌ నడిగర్‌ సంఘం వ్యవహారంలో తమిళనాడు రాష్ట్ర ప్రభుత్వానికి హైకోర్టు కొన్ని ప్రశ్నలు వేసింది. నడిగర్‌ సంఘం నిర్వాహకుల పదవీకాలాన్ని పొడిగిస్తూ జారీ చేసిన జీవోను రద్దు చేయాలని నడిగర్‌ సంఘ సభ్యుడు నంబిరాజన్‌ మద్రాసు హైకోర్టులో దాఖలు చేసిన పిటిషన్‌లో విషయంలో కోర్టు ఈ మేరకు స్పందించింది. పిటిషన్‌పై ప్రభుత్వం, నడిగర్‌ సంఘం సమాధానం ఇవ్వాలని మద్రాసు హైకోర్టు ఆదేశించింది.

Nadigar Sangam

నడిగర్‌ సంఘం భవన నిర్మాణ పనులను కారణంగా చూపిస్తూ సంఘం నిర్వాహకుల పదవీ కాలాన్ని చట్టవిరుద్ధంగా పొడిగించినట్లు కోర్టు దృష్టికి నంబిరాజన్‌ తెలిపారు. ఎలాంటి విచారణ చేయకుండా, సభ్యుల అభిప్రాయాలను తీసుకోకుండా ప్రస్తుత సంఘం నిర్వాహకుల పదవీ కాలాన్ని పొడిగించిన జీవోను రద్దు చేయాలని ఆయన కోరారు. అసోసియేషన్‌ ఎన్నికలు సక్రమంగా నిర్వహించడానికి ఆదేశించాలని కూడా కోరారు.

ఈ పిటిషన్‌పై న్యాయమూర్తి జస్టిస్‌ భరత చక్రవర్తి విచారించారు. ఈ అభ్యర్థనకు సంబంధించిన సివిల్‌ కేసు ఒకటి పెండింగ్‌లో ఉండగా పిటిషన్‌దారుడు కొత్తగా పిటిషన్‌ను సమర్పించినట్లు నడిగర్‌ సంఘం తరఫున న్యాయమూర్తికి తెలిపారు. అయితే పిటిషన్‌ను విచారించిన న్యాయమూర్తి మాత్రం పిటిషన్‌కు సమాధానం ఇవ్వాలని రాష్ట్ర ప్రభుత్వాన్ని, నడిగర్‌ సంఘం నిర్వాహకులను ఆదేశించింది. తదుపరి విచారణను అక్టోబరు 1వ తేదీకి వాయిదా వేశారు.

2019లో ఆఖరిసారిగా నడిగర్‌ సంఘానికి ఎన్నికలు జరిగాయి. అప్పటి నుండి నటుడు నాజర్‌ అధ్యుడిగా ఉంటూ వస్తున్నారు. నడిగర్ సంఘం బైలాస్ ప్రకారం ప్రతి మూడేళ్లకు ఒకసారి సంఘ ఎన్నికలు జరగాల్సి ఉంది. కానీ సంఘం నూతన భవన నిర్మాణ పనులు కొనసాగుతుండటంతో ఎన్నికలను వాయిదా వేస్తూ వస్తున్నారు. ప్రస్తుత అసోసియేషన్‌ పదవీకాలాన్ని మార్చి 19, 2028 వరకు పొడిగిస్తూ తమిళనాడు ప్రభుత్వం ఇటీవల అనుమతి ఇచ్చింది. అదే ఇప్పుడు కోర్టుకు చేరింది. మరి ఈ విషయంలో ప్రభుత్వం, నడిగర్‌ సంఘం ఏం సమాధానం ఇస్తాయో చూడాలి.

బెయిలివ్వండి.. చనిపోయే అవకాశమైనా ఇవ్వండి: నటి రిక్వెస్ట్‌