‘కేజీయఫ్’ (KGF) సినిమాలతో దేశం మొత్తం తనవైపు తిప్పుకున్న నిర్మాణ సంస్థ హోంబలే ఫిల్మ్స్. భారీ సినిమా చేసి భారీతనం చూపించి ఆ పేరు గడించారు అనుకుంటుండగా ‘కాంతార’ (Kantara) అనే చిన్న సినిమాను పెద్దగా సినిమా చేసి బ్యానర్ ఆలోచన ఏంటో చెప్పకనే చెప్పారు. ఇక ప్రభాస్ (Prabhas)– పృథ్వీరాజ్ సుకుమారన్ (Prithviraj Sukumaran) తో కలసి చేసిన ‘సలార్’ (Salaar) వాళ్ల ఆలోచనల్ని ఇంకా క్లియర్గా చెప్పేసింది. ‘సలార్ 2’, ‘కేజీయఫ్ 3’ ఉన్నాయి.. అవి ఇంకా అదిరిపోతాయి అనుకుంటుండగా.. ఇప్పుడు ‘మహావతార్’ సిరీస్ను అనౌన్స్ చేశారు.
‘మహావతార్ సినిమాటిక్ యూనివర్స్’ పేరుతో ఏడు సినిమాలను తీసుకురానున్నట్లు ప్రకటించారు. ఈ మేరకు వాళ్ల లైనప్ను వివరిస్తూ ఓ వీడియోను రిలీజ్ చేశారు. రాబోయే 12 ఏళ్లలో టీమ్ ఆ సిరీస్లో రానున్న సినిమాల పేర్లు, వాటి విడుదల సంవత్సరాలు కూడా వీడియోలో పేర్కొన్నారు. ‘మహావతార్: నరసింహ’ (Mahavatar Narsimha) ను తెరకెక్కిస్తున్న అశ్విన్కుమార్ (Ashvin Kumar) దర్శకత్వంలోనే ఈ సినిమాలు రానున్నాయి. ‘మహావతార్: నరసింహ’ జులై 25, 2025న విడుదల కానుండగా.. ‘మహావతార్ : పరశురామ్’ 2027లో తీసుకొస్తారట.
ఇక ‘మహావతార్ : రఘునందన్’ను 2029లో, ‘మహావతార్ : ద్వారకాదీశ్’ 2031లో, ‘మహావతార్ : గోకులానంద్’ను 2033లో రిలీజ్ చేసే ఆలోచనలో ఉన్నారు. 2035లో ‘కల్కి 1’, 2037లో (కల్కి 2’ రిలీజ్ చేస్తామని టీమ్ ప్రకటించింది. ఇవన్నీ విష్ణుమూర్తి పది అవతారాలపై తెరకెక్కే సినిమాలే. ‘మహావతార్: నరసింహ’ త్రీడీలో ఐదు భాషల్లో రిలీజ్ కానుంది. ఇంత భారీ కాన్వాస్, పెద్ద కథతో రూపొందుతున్న సినిమాల్ని ఒకేసారి అనౌన్స్ చేయడం పెద్ద విషయమే అని చెప్పాలి.
పైన చెప్పిన సినిమాలతోపాటు ‘కాంతార 1’ కూడా లైన్లో ఉంది. భారీ విజయం అందుకున్న ‘కాంతార’ (Kantara) కు ఇది ప్రీక్వెల్గా రూపొందింది. ఈ సినిమా మీద భారీ అంచనాలే ఉన్నాయి. అయితే ఎందుకో కానీ వరుసగా సినిమా చిత్రీకరణ అవాంతరాలు ఎదురవుతూనే ఉన్నాయి. త్వరలోనే సినిమా చిత్రీకరణను ముగించే పనిలో దర్శక హీరో రిషభ్ శెట్టి ఉన్నారు.
