Baahubali Eternal War: ఆ రెండు సినిమాల ఎఫెక్ట్‌.. ఈ సినిమా రెండు నిమిషాల్లో హౌస్‌ఫుల్‌

ఒక సినిమా ప్రభావం.. ఆ సిరీస్‌లో వచ్చే ఇంకో సినిమా మీద కచ్చితంగా ఉంటుంది. ఇది ఎవరూ కాదనలేని విషయం. అందుకే సీక్వెల్స్‌ మోజు టాలీవుడ్‌లో ఎక్కువైపోయింది. అవకాశం ఏ మాత్రం కనిపించినా సినిమాను రెండు ముక్కలు చేసేస్తున్నారు. ఈ ట్రెండ్‌ను ఇటీవల కాలంలో చేసి భారీ విజయం అందుకున్న తొలి సినిమా ‘బాహుబలి’. ‘బాహుబలి: ది బిగినింగ్‌’, ‘బాహుబలి: ది కంక్లూజన్‌’ అంటూ రెండు పార్టులుగా వచ్చిన ఈ సినిమాను కలిపేసి ‘బాహుబలి: ది ఎపిక్‌’ పేరుతో ఇటీవల విడుదల చేసి విజయం సాధించారు కూడా.

Baahubali Eternal War

ఇక ఇప్పుడు తొలి రెండు సినిమాలకు కొనసాగింపుగా ఇప్పుడు ‘బాహుబలి: ది ఎటర్నల్‌ వార్‌’ అనే సినిమాను సిద్ధం చేస్తున్నారు. ఇదేంటి ఎప్పుడూ వినలేదు.. ప్రచారం కూడా లేదు అని అనుకుంటున్నారా? సిద్ధం చేస్తున్నది రాజమౌళి కాదు కాబట్టి. ఆయన సమర్పణలో రూపొందిస్తున్న యానిమేషన్‌ మూవీ ఈ ‘ఎటర్నల్‌ వార్‌’. ఈ యానిమేషన్‌ సినిమా ఇప్పుడు ప్రతిష్ఠాత్మక అన్నెసీ ఇంటర్నేషనల్‌ యానిమేషన్‌ ఫిలిం ఫెస్టివల్‌లో ప్రదర్శితం కాబోతోంది. ‘వర్క్‌ ఇన్‌ ప్రోగ్రెస్‌’ విభాగంలో దీన్ని ప్రదర్శిస్తున్నారు.

ఈ నెలాఖరులో ఫ్రాన్స్‌లోని అన్నెసీలో ఈ చిత్రోత్సవాన్ని నిర్వహిస్తారు. దీని యబుకింగ్స్‌ ఇటీవల ప్రారంభించగా.. ‘బాహుబలి: ది ఎటర్నల్‌ వార్‌’ టికెట్లు రెండు నిమిషాల్లోనే అమ్ముడుపోవడం విశేషం. తద్వారా ప్రపంచ దేశాల్లో ‘బాహుబలి’ సినిమా ఫ్రాంఛైజీపై ఉన్న క్రేజ్‌ తగ్గలేదని అర్థమవుతోంది. ఇక ఇదే ఏవదికపై ‘స్పైడర్‌మ్యాన్‌: ఇన్‌ టు ది స్పైడర్‌ వర్స్‌’తో పాటు, ‘ఫ్లో’ సినిమాలను గతంలో ప్రదర్శించారు. అప్పుడు కూడా ఇవి ‘వర్క్‌ ఇన్‌ ప్రోగ్రెస్‌’ విభాగంలోనే ప్రదర్శితమయ్యాయి. ‘ఫ్లో’ సినిమాకు ఉత్తమ యానిమేషన్‌ చిత్రంగా ఆస్కార్‌ పురస్కారం దక్కిన విషయం తెలిసిందే.

రెండు భాగాలుగా తెరకెక్కుతున్న ‘బాహుబలి: ది ఎటర్నల్‌ వార్‌’ యామినేషన్‌ సినిమాకు ఇషాన్‌ శుక్లా దర్శకుడిగా వ్యవహరిస్తున్నారు. మొదటి భాగం టీజర్‌ ఇటీవల రిలీజ్‌ చేశారు. ఈ సినిమాను వచ్చే ఏడాది రిలీజ్‌ చేయాలని చూస్తున్నారట.

ధనుష్‌ ‘ఓం’పై ‘పుష్ప’ మరక… దర్శకుడు ఏమన్నారంటే?