జనతా గ్యారేజ్ ఇంటర్వెల్ ఫైట్ సూపర్

కమర్షియల్ సినిమాకు ఇంటర్వెల్ బ్యాంగ్ అనేది చాలా ముఖ్యం. ఇక్కడ ట్విస్టులు పెట్టి దర్శకులు సెకండాఫ్ పై ఆసక్తిని కలిగిస్తుంటారు. ‘మిర్చి’, ‘శ్రీమంతుడు’ సినిమాల ద్వారా హిట్ దర్శకుడిగా పేరు తెచ్చుకున్న కొరటాల శివ తన లేటెస్ట్ జనతా గ్యారేజ్ సినిమా ద్వారా హ్యాట్రిక్ విజయం అందుకోవటానికి శ్రమిస్తున్నారు. ఈ సినిమాలో ఇంటర్వెల్ బ్యాంగ్ వద్ద గొప్ప ట్విస్ట్ ను ఇవ్వనున్నట్లు సమాచారం.

అంతే కాదు యంగ్ టైగర్ ఎన్టీఆర్ మాస్ ఫాలోయింగ్ ని దృష్టిలో పెట్టుకుని ఇంటర్వెల్ కి కొన్నిక్షణాల ముందు భారీ ఫైట్ ను పెట్టినట్లు చిత్రబృందం తెలిపింది. “నాన్నకు ప్రేమతో” బీ, సీ సెంటర్లలో ఆడక పోవడానికి కారణం భారీ యాక్షన్ సీన్లు లేకపోవడమే అని గుర్తించిన ఎన్టీఆర్ జనతా గ్యారేజ్ లో మాస్ ప్రేక్షకులను ఆకట్టుకునేలా ఫైట్లు చేసినట్లు తెలిసింది. ఇంట్రెవల్ ఫైట్ సినిమాలో హైలెట్ గా నిలుస్తుందని టాక్. గత వారం వరకు హైదరాబాద్లోని సారధి స్థూడియోలో ఈ చిత్రం షూటింగ్ జరుపుకుంది.

మిగిలిన కొన్ని సీన్ల కోసం చిత్ర యూనిట్ బ్యాంకాక్ కు వెళ్లనుంది. మైత్రి మూవీ మేకర్స్ వారు నిర్మిస్తున్న ఈ చిత్రంలో మోహన్ లాల్ కీలక పాత్ర పోషిస్తుండగా, సమంత, నిత్యామీనన్లు హీరోయిన్లుగా నటిస్తున్నారు. ఆగస్టు 12 నాటికి రిలీజ్ అయ్యేలా చిత్ర బృందం కష్టపడుతోంది.