డ్రగ్స్ కేసులో హీరోయిన్ కాజల్ మేనేజర్ అరెస్టు..!

తెలుగులో టాప్‌ హీరోయిన్‌గా వ్యవహరిస్తున్న కాజల్‌ అగర్వాల్ మేనేజర్ రోనీని తాజాగా పోలీసులు అరెస్టు చేశారు. టాలీవుడ్‌లో డ్రగ్స్ సంచలనం సృష్టించడంతో ప్రత్యేక పోలీసు బలగాలు సినీ పరిశ్రమకు సంబంధం ఉన్న వారి ఇళ్లలో సోదాలు, తనిఖీలు నిర్వహిస్తున్నారు. రోనీ ఇంట్లో భారీగా గంజాయిని స్వాధీనం చేసుకున్నట్టు తెలుస్తోంది. ప్రస్తుతం సిట్ పోలీసులు అదుపులో ఉన్న రోనీ గతంలో హీరోయిన్లు లావణ్య త్రిపాఠి, రాశీఖన్నా దగ్గర మేనేజర్‌గా పని చేశాడు. ఒకవైపు నోటీసులు అందుకున్న సినీ ప్రముఖులను విచారిస్తూనే.. మరో వైపు తనిఖీలతో పోలీసులు డ్రగ్స్ కేసు విషయంలో దూసుకుపోతున్నారు.

ఈ కేసులో ఇప్పటికే దర్శకుడు పూరీ జగన్నాథ్‌, కెమెరామ్యాన్‌ శ్యామ్‌ కే నాయుడు, నటులు సుబ్బరాజు, తరుణ్‌ సిట్‌ విచారణకు హాజరయ్యారు. తాజాగా మరో టాలీవుడ్‌ హీరో నవదీప్ సోమవారం సిట్‌ విచారణను ఎదుర్కొంటున్నారు. ఇప్పటివరకు జరిగిన సిట్‌ విచారణలో సుబ్బరాజు, తరుణ్‌ పలు విషయాలు వెల్లడించారని, టాలీవుడ్‌లో డ్రగ్స్‌ తీసుకోవడం సాధారణమే అంటూ.. డ్రగ్స్‌ విషయంలో ప్రమేయమున్న పలువురు ప్రముఖుల పేర్లను సైతం వెల్లడించారని సిట్‌ వర్గాలు మీడియాకు తెలిపాయి. ఈ నేపథ్యంలోనే ప్రస్తుతం హైదరాబాద్‌లో హీరోయిన్‌ కాజల్‌కు మేనేజర్‌గా ఉన్న రోనీని అరెస్టు చేశారని అంటున్నారు. సిట్‌ విచారణలో సినీ నటులు ఇచ్చిన సమాచారం ఆధారంగానే డ్రగ్స్‌ రాకెట్‌తో సంబంధమున్న మరింతమందిని పట్టుకునేందుకు పోలీసులు ప్రయత్నిస్తున్నట్టు తెలుస్తోంది.

Also, do SUBSCRIBE to our YouTube channel to get latest Tollywood updates.