నయనతారను ఫాలో అవుతున్న కాజల్

క్రేజీ హీరోయిన్ కాజల్ అగర్వాల్ సరిగ్గా ఏడాది ముందు ఆఫర్లు లేక బాలీవుడ్ లో సెకండ్ హీరోల సరసన కూడా నటించడానికి ఒకే చెబుతూ కెరీర్ ను నెట్టుకొస్తున్న తరుణంలో తెలుగు-తమిళ భాషల్లో వరుస విజయాలు సొంతం చేసుకొని మళ్ళీ పూర్వ వైభవం సాధించుకొంది. ఇప్పుడు అమ్మడికి ఆఫర్లు క్యూ కట్టాయి. అయితే.. ఈ సెకండ్ ఇన్నింగ్స్ ను కాజల్ చాలా జాగ్రత్తగా ప్లాన్ చేసుకొంటోంది. ఒకపక్క అగ్ర కథానాయకుల సరసన నటిస్తూనే మరోపక్క యువ హీరోలతోనూ రొమాన్స్ చేసేలా ప్లాన్ చేసుకొంటోంది.

ఈ విషయంలో కాజల్ కి నయనతార టీచర్ అని చెప్పుకోవాలి. ఎందుకంటే.. ఒకపక్క బాలకృష్ణ, చిరంజీవి లాంటి సీనియర్ హీరోలతో జత కడుతూనే విజయ్ సేతుపతి, శివకార్తికేయన్ లాంటి యంగ్ హీరోస్ సరసన కూడా హీరోయిన్ గా నటిస్తూ లేడీ సూపర్ స్టార్ గా ఎదిగింది. ఇప్పుడు కాజల్ కూడా ఆమెను ఫాలో అవుతూ కెరీర్ ను చక్కగా ప్లాన్ చేసుకొంటోంది. తాజా సమాచారం ప్రకారం.. శర్వానంద్ సరసన నటించేందుకు కాజల్ అంగీకరించిందట. సుధీర్ వర్మ దర్శకత్వంలో రూపొందనున్న ఈ చిత్రంలో కాజల్ మెయిన్ హీరోయిన్ కాగా.. నివేదా థామస్, షాలిని పాండేలు కూడా హీరోయిన్స్ గా కనిపించనున్నారు. శర్వానంద్ ఈ సినిమాలో మాఫియా డాన్ గా కనిపించనున్నాడని వినికిడి.