కళ్యాణ్ రామ్ కి అవార్డులు రావడం ఖాయం – పూరి

నందమూరి కళ్యాణ్ రామ్ హీరోగా ఎంట్రీ ఇచ్చి పదమూడేళ్లు కావస్తోంది. ఇన్నేళ్ల కళ్యాణ్ రామ్ కెరీర్ లో హిట్లు ఉన్నాయి. ఫట్లు ఉన్నాయి. అయితే అవార్డు మాత్రం ఒక్కటీ లేకపోవడం గమనార్హం. నటుడిగానే కాకుండా నిర్మాతగానూ సినిమాలు చేస్తూ వస్తున్నా కళ్యాణ్ రామ్ ఏ రకంగానూ నేటి వరకు ఓ అవార్డు అందుకున్నది లేదు. అయితే రేపు విడుదల కానున్న ‘ఇజం’ సినిమాతో కళ్యాణ్ రామ్ ఉత్తమ నటుడిగా రెండు తెలుగు రాష్ట్రాల అవార్డులు గెలుచుకుంటాడని దర్శకుడు పూరి జోస్యం చెబుతున్నారు.కళ్యాణ్ హీరోగా పూరి జగన్నాధ్ తెరకెక్కించిన చిత్రం ‘ఇజం’.

రేపు (21-10-16) ప్రేక్షకుల ముందుకు రానున్న ఈ సినిమా గురించి పూరి మాట్లాడుతూ “పదేళ్ల క్రితమే ఈ కథ సిద్ధమైంది. అప్పటినుండి ఇప్పటివరకు మారిన పరిస్థుతలకు అనుగుణంగా మార్పులు చేర్పులు చేశామన్న ఈ డాషింగ్ డైరక్టర్ ఈ కథకు నిజాయితీ గల నటుడు కావాలి. అందుకే కళ్యాణ్ రామ్ తో సినిమా అనగానే ఈ కథే చేయాలనుకున్నా. ఆయన నటన సినిమాకే హైలైట్ గా నిలుస్తుంది. పాత్ర కోసం సన్నాబడాలని చెప్పడమే తడవుగా మూడు నెలల్లో బరువు తగ్గి ఏకంగా సిక్స్ ప్యాక్ చేశాడు. ప్రతి సినిమాలోను హీరో ఓ సమస్యపై పోరాడుతుంటాడు. పాత్రికేయుడి కోణంలో సాగే ఈ సినిమాలో మాత్రం పోరాడుతూనే ఆ సమస్యకి పరిష్కారం కూడా చూపుతాడు. అది ఆసక్తికరంగా ఉంటుందన్న పూరి ఈ సినిమాతో కళ్యాణ్ రామ్ ఆంధ్ర, తెలంగాణ రాష్ట్రాల నుండి ఉత్తమ నటుడిగా పురస్కారాలు గెలుచుకుంటాడని నమ్మకంగా చెప్పారు. పూరి చెప్పిన జోస్యం ఎంతవరకు నిజమవుతుందో మరి..!