కత్తిలాంటోడు డైలాగ్ లీక్..!

“మొక్కే కదాని పీకేస్తే పీక కోస్తా..”, “తప్పు మా వైపు ఉంది కాబట్టి తల వంచుకు పోతున్నా.. లేదంటే తలలు తీసుకు వెళ్లేవాణ్ణి “.. అంటూ ఇంద్ర సినిమాలో మెగాస్టార్ చిరంజీవి చెప్పిన డైలాగులు అభిమానులతో విజిల్స్ వేయించాయి. అందుకే తాజాగా తెరకెక్కుతున్నఆయన సినిమా కత్తిలాంటోడులోనూ ఇలాంటి పవర్ ఫుల్ డైలాగులు ఎన్నో ఉన్నాయని సమాచారం.

ఇందుకోసం ప్రముఖ రచయితలు పరుచూరి బ్రదర్స్ తో కలిసి రచయిత ఆకుల శివ మాస్ ని ఆకట్టుకునే మాటలు రాసినట్లు తెలిసింది. వాటిలో ఒక డైలాగ్ లీక్ అయింది.  ” వీళ్లకి దుక్కి దున్నడమే తెలుసు.. దుర్మార్గం చెయ్యడం తెలియదు. నాగలి పట్టడమే తెలుసు గాని నరకటం తెలియదు. ఇప్పుడు మీరు వీళ్ల పొలాలకి నీళ్లు ఇవ్వకపోతే ఆ నాగలి పట్టిన చేతులే మీలాంటి కలుపు మొక్కల్ని నరకుతూ.. మీ గుండెల్ని దున్నుకు పోతాయి.” … రైతుల నాయకుడిగా చిరు పోరాటం చేసే సమయంలో చెప్పే డైలాగ్ ఇది. ఈ డైలాగ్ అన్నయ్య నోటి నుంచి వస్తే ఎలాగుంటుందో ఊహించుకుంటూ తమ్ముళ్లు సంబర పడిపోతున్నారు.

వి.వి.వినాయక్ దర్శకత్వంలో రూపుదిద్దుకుంటున్న ఈ మూవీ లో మాస్ ని ఆకట్టుకునే అన్ని ఎలిమెంట్స్ ఉన్నట్లు చిరు స్వయంగా చెప్పారు. ఆయన పక్కన ఈ చిత్రంలో బాలీవుడ్ సుందరి నర్గిస్ ఫక్రి రొమాన్స్ చేయనుంది. సాయి ధరమ్ తేజ్, వరుణ్ తేజ్ ప్రత్యేక పాత్రలో కనిపించనున్న ఈ సినిమాను సంక్రాంతికి రిలీజ్ చేయాలని నిర్మాత రామ్ చరణ్ తేజ్ ప్లాన్ చేస్తున్నారు.