మాటల మాంత్రికుడు త్రివిక్రమ్ శ్రీనివాస్ గత చిత్రాలను గమనిస్తే ఓ కామన్ పాయింట్ కనిపిస్తుంది. అదే హీరోతో పాటు.. సినిమాలో మరో బలమైన పాత్ర ఉండడం. అత్తారింటికి దారేది సినిమాలో నదియా, అజ్ఞాతవాసి లో కుష్బూ లు ఆ బలమైన పాత్రల్లో మెరిశారు. ప్రస్తుతం ఎన్టీఆర్ తో చేయనున్న సినిమాలోను ఇటువంటి పవర్ ఫుల్ రోల్ ఒకటి ఉంది. ఈ పాత్రలో ఎవరు నటిస్తే బాగుంటుందో త్రివిక్రమ్ టీమ్ సభ్యులు చర్చలు జరిపి, ముగ్గురు సీనియర్ హీరోయిన్స్ పేర్లు పరిశీలించారు. లయ, సిమ్రాన్, మీనాలను సంప్రదించారు. వీరిలో లయ ఈ పాత్ర చేయడానికి ఆసక్తి కనబరిచినట్లు తెలిసింది.
గతంలో హీరోయిన్ గా మెప్పించిన ఈమె పెళ్లి తర్వాత అమెరికాలో సెటిల్ అయింది. పిల్లలు పెద్దవారు కావడంతో సినిమాలో రీఎంట్రీ ఇవ్వడానికి చూస్తోంది. మహిళలను ఎంతో గౌరవంగా చూపించే త్రివిక్రమ్ శ్రీనివాస్ దర్శకత్వంలో నటించడానికి ఆమె సంతోషంగా గ్రీన్ సిగ్నల్ ఇచ్చింది. ఇక ఆమె రోల్ గురించి కొంచెం కూడా బయటికి రాలేదు. ఈ సినిమాకోసం ఎన్టీఆర్ చాలా కష్టపడుతున్నారు. బాలీవుడ్ ఫిట్ నెస్ ట్రైనర్ ఆధ్వర్యంలో ఫిట్ గా అవుతున్నారు. ఈనెల చివరి వారంలో సెట్స్ మీదకు వెళ్లనున్న ఈ చిత్రంలో ఎన్టీఆర్ సరసన డీజే బ్యూటీ పూజా హెగ్డే హీరోయిన్ గా నటించనుంది. హారికా అండ్ హాసిని క్రియేషన్స్ బ్యానర్ లో రాధా కృష్ణ నిర్మిస్తున్న ఈ సినిమాకు తమన్ సంగీతం అందించనున్నారు.
