2018 లో రాజమౌళితో సినిమా చేస్తానని చెప్పిన మహేష్!

దర్శకధీరుడు ఎస్.ఎస్.రాజమౌళి దర్శకత్వంలో మహేష్ బాబు సినిమా చేయబోతున్నారనే విషయం కొత్తేమీ కాదు. రెండు మూడేళ్లుగా ఈ కాంబినేషన్ గురించి అందరూ ఆసక్తిగా మాట్లాడుకొంటున్నారు. మహేష్, రాజమౌళి మధ్య స్టోరీ చర్చలు కూడా సాగాయి. ఇద్దరికీ సమయం దొరకకపోవడంతో ఆ ప్రాజెక్ట్ పట్టాలెక్కలేదు. ఎట్టకేలకి ఆ కలయికలో సినిమాకి ఇప్పుడు రంగం సిద్ధమైనట్టు తెలుస్తోంది. 2018లో పక్కాగా ఆ సినిమా సెట్స్ మీదకు వెళ్లనుంది. ఈ విషయాన్ని స్వయంగా మహేష్ బాబు వెల్లడించారు. మురుగదాస్ దర్శకత్వంలో ఆయన నటించిన స్పైడర్ మూవీ మరో రెండు రోజుల్లో థియేటర్లోకి రానుంది.

ఈ చిత్రం ప్రచార కార్యక్రమంలో పాల్గొన్న మహేష్ రాజమౌళితో సినిమా గురించి బయటపెట్టారు. “రాజమౌళితో సినిమా చేస్తాను. అది వచ్చే సంవత్సరం మొదలు కావచ్చు”అని ఓ ప్రశ్నకు సమాధానంగా చెప్పారు. ప్రస్తుతం మహేష్, కొరటాల శివ దర్శకత్వంలో ‘భరత్ అనే నేను’ చేస్తున్నారు. ఆ తర్వాత వంశీ పైడిపల్లి దర్శకత్వంలో నటిస్తారు. ఈ రెండు సినిమాలను సాధ్యమైనంత తొందరగా పూర్తి చేసి ఆ తర్వాత రాజమౌళితో కలిసి నడవనున్నారు.