కొరటాల శివ దర్శకత్వంలో సూపర్ స్టార్ మహేష్ బాబు చేస్తున్న “భరత్ అనే నేను” సినిమా దాదాపు షూటింగ్ పూర్తి చేసుకుంది. నిన్నటి వరకు హైదరాబాద్ లోని ఓ స్టూడియోలో వేసిన భారీ టెంపుల్ సెట్ లో పండుగ నేపథ్యంలో పాటని షూట్ చేశారు. మిగిలిన ఒక పాట కోసం త్వరలో స్పెయిన్ కి వెళ్లనున్నారు. విదేశాలకు వెళ్లే లోపున డబ్బింగ్ పూర్తి చేయాలనీ కొరటాల భావించారు. అందుకే ఈ రోజు నుంచి డబ్బింగ్ పనులు మొదలెట్టారు. మహేష్ బాబు కూడ తన పాత్ర తాలూకు డబ్బింగ్ పనుల్ని మొదలుపెట్టేశారు.
ఆయనతో పాటు ఇతర నటీనటులు కూడ డబ్బింగ్ లో పాల్గొంటున్నారు. కొరటాల శివ దగ్గరుండి ఈ పనుల్ని పర్యవేక్షిస్తున్నారు. ప్రముఖ నిర్మాత డి.వి.వి. దానయ్య నిర్మిస్తున్న ఈ సినిమాకి రాక్ స్టార్ దేవీ శ్రీ ప్రసాద్ సంగీతం అందిస్తున్నారు. దేవీ కంపోజ్ చేసిన పాటలను త్వరలో రిలీజ్ చేయనున్నారు. ఇందుకోసం గ్రాండ్ గా వేడుక నిర్వహించనున్నారు. బాలీవుడ్ బ్యూటీ కైరా అద్వానీ ఈ చిత్రం ద్వారా తెలుగు వారికీ పరిచయం కాబోతోంది. ఇండస్ట్రీ హిట్ శ్రీమంతుడు కాంబినేషన్లో వస్తున్న ఈ మూవీ ఏప్రిల్ 20న విడుదల కానుంది.
