మురుగదాస్ దర్శకత్వంలో వస్తున్న సినిమాలో భారీ యాక్షన్ సీన్లు

సూపర్ స్టార్ మహేష్ బాబు, కమర్షియల్ డైరక్టర్ మురుగదాస్ కాంబినేషన్లో వస్తున్న సినిమాలో భారీ యాక్షన్ సీన్లు ఉండనున్నాయి. ప్రిన్స్ ఇన్వెస్ట్ గేషన్ ఆఫీసర్ గా నటిస్తున్న ఈ చిత్రానికి ప్రముఖ స్టంట్ కొరియోగ్రాఫర్లు ఐదు మంది పనిచేస్తున్నారు. ఒక్కో ఫైట్ ని ఒక్కో స్టైల్ ల్లో మురుగ దాస్ చిత్రీకరిస్తున్నట్లు తెలిసింది. పీటర్ హెయిన్స్, అనిల్ అరుసు, రామ్ లక్ష్మణ్, రవి వర్మలు సూపర్ స్టార్ కోసం ఇదివరకు ఏ చిత్రంలో చూడనటువంటి యాక్షన్ సీక్వెన్స్ ని డిజైన్ చేసినట్లు సమాచారం.

ఇప్పటికే  పీటర్ హెయిన్స్, రవి వర్మ ఆధర్యంలో హైదరాబాద్, ఖమ్మం ప్రాంతాల్లో రెండు భారీ ఫైట్స్ ని తెరకెక్కించినట్లు చిత్రబృందం వెల్లడించింది. మరో రెండు ఫైట్స్ ని గుజరాత్ రాజధాని అహ్మదాబాద్ లో చిత్రీకరించనున్నట్లు వివరించింది. వంద కోట్ల బడ్జెట్ తో ఏక కాలంలో తెలుగు, తమిళ భాషల్లో నిర్మితమవుతున్న ఈ మూవీలో సూపర్ స్టార్ సరసన ఫిట్ బ్యూటీ రకుల్ ప్రీత్ సింగ్ నటిస్తోంది. జాతీయ అవార్డు గ్రహీత సినిమాటోగ్రాఫర్ సంతోష్ శివన్ పనిచేస్తున్న ఈ చిత్రం ఫస్ట్ లుక్ దీపావళికి రిలీజ్ కానుంది.