‘కల్కి 2’ సినిమా గురించి గత కొన్ని రోజులుగా చాలా రకాల వార్తలు వస్తున్నాయి. సినిమా షూటింగ్ ఓవైపు జరుగుతున్నా.. మరోవైపు పుకార్లు మాత్రం ఆగడం లేదు. దానికి కారణం సినిమాలో కీలకమైన ఓ పాత్రకు సంబంధించి సినిమా టీమ్ నుండి ఎలాంటి అప్డేట్ రాకపోవడమే. అదే ‘సుమతి’. సినిమాలో కీలకమైన కల్కి పాత్రకు జన్మనివ్వాల్సిన పాత్ర సుమతి. ‘కల్కి 2898 ఏడీ’ సినిమాలో ఆ పాత్ర నటించిన కథానాయిక.. రెండో పార్టు నుండి తప్పుకోవడమే దీనికి కారణం. ఈ పార్ట్లో ఎవరు నాయిక అనేది ఇంకా టీమ్ చెప్పలేదు.
‘కల్కి 2898 ఏడీ’ సినిమాకు కీలకమైన సుమతి పాత్రలో దీపికా పడుకొణె నటించిన విషయం తెలిసిందే. ఆ సినిమా షూటింగ్లో ఏం జరగిందో, సినిమా రిలీజ్ తర్వాత ఏం జరిగిందో తెలియదు కానీ.. రెండో పార్టు నుండి తప్పుకున్నారు. ఈ సినిమా షూటింగ్ ప్రారంభమయ్యే నాటికి ఆ పాత్ర కోసం మరో కథానాయికను ఎంపిక చేస్తారు అని అనుకున్నారంతా. ఈ క్రమంలో ప్రియాంక చోప్రా పేరు, ఆ తర్వాత సాయిపల్లవి పేరు వినిపిచాయి. ఇప్పుడు ఈ వరుసలోకి ఆలియా భట్ పేరు చర్చలోకి వచ్చింది.
ఈ నేపథ్యంలో దర్శకుడు నాగ్ అశ్విన్ని అడిగితే.. సినిమా అప్డేట్ కూడా చెప్పారు. ‘కల్కి 2’ సినిమా షూటింగ్ వేగంగా జరుగుతోంది అని చెప్పిన నాగీ.. ఇప్పటికే రెండు షెడ్యూల్స్ పూర్తయ్యాయని తెలిపారు. మూడు నెలల్లో సినిమా రెగ్యులర్ షూటింగ్ మొదలు పెట్టాలని ప్లాన్ చేస్తున్నారట. త్వరలో విరామం లేకుండా షూటింగ్ పూర్తి చేయాలన్న ఆలోచన చేస్తున్నామని నాగీ చెప్పడంతో ఇప్పటివరకు చేసిన షూటింగ్ రెగ్యులర్ షూటింగ్ కాదని అర్థమవుతోంది.
ఇక సుమతి పాత్ర గురించి చెబుతూ.. దీపిక పదుకొణె సినిమాలో లేరు కాబట్టి, సుమతి పాత్ర తీసేయడానికి లేదు. ఎందుకంటే ‘కల్కి’కి జన్మనిచ్చేది ఆమెనే. అందుకే ఆ నటిని మార్చవచ్చు. అయితే ఆ పాత్ర విషయంలో ఇంకా ఎవరినీ అనుకోలేదు అని చెప్పారు. ఈ మాటలో డిస్కషన్ ఆపాలని ఇలా అన్నారా? లేక ఏ హీరోయిన్ ఈ పాత్ర కోసం ముందుకు రావడం లేదా అనేది తెలియడం లేదు.
