ఒకసారి తెరపై కనపడిన హీరో, హీరోయిన్లు మరోమారు జంటకడుతున్నారంటే కొత్తదనం కోరే ప్రేక్షకులకు అంతగా రుచించదు. ఒకవేళ అలాంటి సందర్భం వస్తే ‘హిట్ పెయిర్’ అన్న మంత్రం జపించాల్సిందే. అందుకే మన దర్శక, నిర్మాతలు సరికొత్త అందాల కోసం మలయాళ కుట్టీలను, ముంబై ముద్దుగుమ్మలను జల్లెడ వేసి మరీ తీసుకొస్తుంటారు. అయితే ఇది అప్పటికే వున్న వారి కాంబినేషన్లు కుదరనప్పుడే. తాజగా నాగచైతన్య నటించనున్న ఓ సినిమాకు సరికొత్త జోడీ కుదిరింది.నాగచైతన్య – కళ్యాణ్ కృష్ణ కలయికలో ఓ సినిమా రానున్న విషయం విదితమే. త్వరలో సెట్స్ పైకి వెళ్లనున్న ఈ సినిమాలో రకుల్ ప్రీత్ హీరోయిన్ గా నటించనున్నట్టు వార్తలు వినవస్తున్నాయి.
అయితే ఇందులో మరో భామకి ప్రాధాన్యం ఉందట. ఆ పాత్రకు కళ్యాణ్ కృష్ణ తొలి చిత్రం ‘సోగ్గాడే చిన్ని నాయనా’ సినిమాలో నాగ్ సరసన నటించిన లావణ్య త్రిపాఠిని ఎంచుకున్నారట. ఆ రకంగా తండ్రులు, తనయులతో సరసాలాడిన అతి కొద్దిమంది భామామనుల్లో లావణ్య పేరు చేరింది. రకుల్ ఇప్పటికే అగ్ర కథానాయకుల సినిమాలతో టాప్ లీగ్ లోకి వెళ్లగా, లావణ్య ఆ దిశగా అడుగులు వేస్తోంది. అయితే ‘సోగ్గాడే..’ సినిమాలోలానే ఇందులోను రెండో హీరోయిన్ లాంటి పాత్రతోనే సరిపెట్టుకోవాల్సి వచ్చిందట. ఇక ఈ సినిమా టైటిల్ విషయానికొస్తే.. నాగ్ ‘నిన్నే పెళ్లాడతా’ సహా ‘కళ్యాణం’ అనే పేర్లు పరిశీలనకు వచ్చినా కడకు ‘ఒకసారి ఇటు చూడవా’ అనే టైటిల్ ఖరారు చేశారట. ఈ మేరకు అక్కినేని వర్గాల నుండి అధికారిక ప్రకటన వెలువడాల్సి ఉంది.
