మహానటి చిత్ర విజయంతో తెలుగు చిత్ర దర్శకనిర్మాతల్లో దైర్యం పెరిగింది. కమర్షియల్ కథలకంటే బయోపిక్ లపై ఆసక్తి కనబరుస్తున్నారు. స్టార్ హీరోలు సైతం నిజ జీవిత గాథల్లో జీవించడానికి సై అంటున్నారు. బాలకృష్ణ ఎన్టీఆర్ బయోపిక్ నిర్మాణంలో బిజీగా ఉంటే చిరంజీవి ఉయ్యాలవాడ నరసింహారెడ్డి గా నటిస్తున్నారు. కోడి రామ్మూర్తి నాయుడుగా రానా కనిపించడానికి కసరత్తులు చేస్తున్నారు. తాజాగా నాని కూడా బయోపిక్ చేయడానికి ఒకే చెప్పారు. స్టూవర్టుపురం గజదొంగ “టైగర్ నాగేశ్వరరావు” గా నటించడానికి గ్రీన్ సిగ్నల్ ఇచ్చారు, ఇతను అనేక బ్యాంకులను కొల్లగొట్టారు. పోలీసులకు కంటిమీద కునుకు లేకుండా చేసాడు.
కొల్లగొట్టిన సొమ్మును పేదలకు, కష్టాల్లో ఉన్నవారికి పంచడంతో వారి దృష్టిలో దేవుడయ్యాడు. చివరికి ఒక భారీ ఎంకౌంటర్లో చనిపోయాడు. అతని జీవితం గురించి పూర్తిగా తెలుసుకున్న తర్వాత నాని ఈ బయోపిక్ చేయడానికి సిద్ధమయ్యారు. “కిట్టు ఉన్నాడు జాగ్రత్త”ను తెరకెక్కించిన వంశీకృష్ణ ఈ సినిమాని డైరక్ట్ చేయనున్నారు. ప్రస్తుతం నాని శ్రీరామ్ ఆదిత్య దర్శకత్వంలో మల్టీస్టారర్ మూవీ చేస్తున్నారు. ఆలాగే ఈనెల 10 నుంచి మొదలుకానున్న బిగ్ బాస్ సీజన్ 2 కి హోస్ట్ గా వ్యవహరించనున్నారు. ఈ షోలో పాల్గొంటూనే బయోపిక్ ని పట్టాలెక్కించనున్నారు.
