ఎవడో ఒకడు నాని కాదట..!

నాని కెరీర్ భూమ్మీది మోటారు వాహనాల కంటే, ఖగోళంలోని గ్రహలకంటే వేగంగా ఉంది. ఈ ఏడాది ఇప్పటికే మూడు సార్లు బాక్సాఫీస్ వద్ద విజయ పతాకం ఎగురవేసిన నాని వచ్చే నెలలో మరో సినిమాని తెరమీదికి తీసుకొచ్చే కసరత్తులు చేస్తున్నాడు. దీంతోపాటు తర్వాతి సినిమాల ప్రణాళికలను సిద్ధం చేస్తూ కాలంతో పోటీ పడుతున్నాడు. ఆ క్రమంలోనే వేణు శ్రీరామ్ తోనూ ఓ సినిమా చేయనున్నాడు ఈ నేచురల్ స్టార్.

‘ఓ మై ఫ్రెండ్’ సినిమాతో మెగాఫోన్ పట్టిన వేణు శ్రీరామ్ రెండో సినిమాగా రవితేజతో ఓ సినిమా మొదలెట్టాడు. ‘ఎవడో ఒకడు’ పేరుతో దిల్ రాజు నిర్మాతగా పూజా కార్యక్రమాల వరకూ వెళ్లిన ఈ సినిమా అక్కడితోనే ఆగిపోయింది. ఇప్పుడు నానితో వేణు శ్రీరామ్ సినిమా అనేసరికి ఆ కథతోనే కానిచ్చేస్తున్నారని ప్రచారం జరిగింది. విషయం దర్శకుడి వరకూ చేరడంతో ఆ కథకి ఈ సినిమాకి ఎలాంటి సంబంధం లేదనీ, నాని కోసం రాస్తున్నది కొత్త కథని సన్నిహితుల ద్వారా వివరణ ఇచ్చే ప్రయత్నం చేశాడు. నాని శైలి హాస్యం, కుటుంబ బంధాలతో ఈ సినిమా ఉండబోతుందట. అన్నీ అనుకున్నట్టు జరిగితే ఫిబ్రవరిలో సెట్స్ పైకి వెళ్లనుంది సినిమా. ‘ఎవడో ఒకడు’లో హీరో లెక్చరర్ గనక కాస్త పెద్ద హీరో అయితే బావుంటుంది. అప్పట్లో నాగార్జున పేరు ప్రస్తావనకొచ్చిందీ అందుకే మరి..!