మెగాస్టార్ చిత్రాన్ని రీమేక్ చేస్తానన్న నాని

నేచురల్ స్టార్ నానికి మెగాస్టార్ చిరంజీవి అంటే చాలా ఇష్టం. తాను సినిమారంగంలోకి అడుగుపెట్టడానికి కారణమయిన వారిలో చిరు ఒకరని నాని అనేక సార్లు చెప్పారు. అలా చిరు మాదిరిగా ఇండస్ట్రీ లో గాడ్ ఫాదర్ లేకున్నా నాని హీరోగా మారి వరుసగా విజయాలను అందుకుంటున్నారు. ప్రస్తుతం యువ దర్శకుడు మేర్లపాక గాంధీ దర్శకత్వంలో “కృష్ణార్జున యుద్ధం” సినిమా చేస్తున్నారు. ఆలాగే నిర్మాతగా మారి “అ!” సినిమాని నిర్మించారు. నిత్యా మీనన్‌, కాజల్‌ అగర్వాల్, శ్రీనివాస్‌ అవసరాల, రెజీనా, ప్రియదర్శి, ఈషా రెబ్బ, మురళీశర్మ, రోహిణి, దేవదర్శిని, సుకుమారన్‌ తదితరులు కీలక పాత్రలు పోషించిన ఈ చిత్రం నేడు రిలీజ్ అయి మంచి రెస్పాన్స్ అందుకుంది.

ఈ సందర్భంగా ఏర్పాటు చేసిన మీడియా సమావేశంలో విలేకరులు అడిగిన ప్రశ్నలకు సమాధానం చెప్పారు. టాలీవుడ్ స్టార్స్‌ నటించిన చిత్రాన్ని మీరు రీమేక్ చేయాల్సి వస్తే ఏ చిత్రాన్ని చేస్తారు.. అని మీడియా నానిని ప్రశ్నించింది. దీనికి నాని స్పందిస్తూ “మెగాస్టార్ చిరంజీవిగారి “చంటబ్బాయ్” చిత్రాన్ని రీమేక్ చేస్తానని తెలిపారు. ఆ సినిమాని రీమేక్ చేయాలని ఎప్పటి నుంచో తనకుందని, వీలైతే ఖచ్చితంగా రీమేక్ చేస్తానని చెప్పారు.