ఫిబ్రవరిలో ఫస్ట్ లుక్, ఏప్రిల్ లో సినిమా!

“లై” తర్వాత రెస్ట్ తీసుకోకుండా ఇమ్మీడియట్ గా తన 25వ చిత్రాన్ని మొదలెట్టిన నితిన్ ఆ సినిమాకి సంబంధించిన విశేషాలను నేడు ట్విట్టర్ ద్వారా అందరికీ తెలియజేశాడు. లిరిక్ రైటర్ టర్నడ్ డైరెక్టర్ కృష్ణచైతన్య దర్శకత్వంలో తెరకెక్కుతున్న ఈ చిత్రంలో కథానాయికగా “లై” చిత్రంతో తెలుగుతెరకు పరిచయమైన మేఘా ఆకాష్ మరోమారు నితిన్ సరసన కనువిందు చేయనుంది. అధికశాతం అమెరికాలో చిత్రీకరించబడిన ఈ చిత్రం టైటిల్ ను ఫిబ్రవరి 12న ప్రకటించనుండగా.. ఫిబ్రవరి 14న ప్రేమికుల రోజున ఈ చిత్రం ఫస్ట్ లుక్ టీజర్ ను విడుదల చేయనున్నారు. ఇకపోతే.. ఈ చిత్రాన్ని ఏప్రిల్ 5న ప్రపంచవ్యాప్తంగా విడుదల చేసేందుకు దర్శకనిర్మాతలు సన్నాహాలు చేస్తున్నారు.

పవన్ కళ్యాణ్ క్రియేటివ్ వర్క్స్ పతాకంపై త్రివిక్రమ్ శ్రీనివాస్ తో కలిసి సుధాకర్ రెడ్డి నిర్మిస్తున్న ఈ చిత్రం చివరి షెడ్యూల్ చిత్రీకరణ ప్రస్తుతం జరుగుతోంది. ఈ చిత్రంలో ప్రతినాయకుడిగా నటించేది ఎవరు అనే విషయం మాత్రం ఆసక్తికరంగా మారింది. ఈ చిత్రానికి “అక్కడ అమ్మాయి, ఇక్కడ అబ్బాయి” అనే టైటిల్ పరిశీలనలో ఉంది. “రౌడీ ఫేలో” అనే చిత్రంతో దర్శకుడిగా మారిన కృష్ణచైతన్య ఆ సినిమా ఆశించిన స్థాయిలో ఆడకపోవడంతో నితిన్ సినిమాను చాలా జాగ్రత్తగా తెరకెక్కించాడని వినికిడి. మరి ఈ సెకండ్ ఛాన్స్ తోనైనా కృష్ణచైతన్య దర్శకుడిగా తన ఉనికిని నిలబెట్టుకొంటాడో లేదో చూడాలి.