డూప్ లేకుండా నటిస్తున్న చిరంజీవి!

డైరక్టర్లు కోరుకున్న దానికంటే మరింత బాగా నటించడం చిరంజీవికి తొలి చిత్రం నుంచి అలవాటు. డైరక్టర్ సంతృప్తి చెందితే ప్రేక్షకుడు తప్పకుండా సంతోషిస్తాడని ఆయన నమ్మకం. ఇప్పటికీ తన నమ్మకాలను వదులుకోవడం లేదు. తాజాగా చిరు తొలి స్వాతంత్ర సమర యోధుడు ఉయ్యాలవాడ నరసింహారెడ్డి జీవితం ఆధారంగా రూపుదిద్దుకోనున్న సైరా  నరసింహా రెడ్డి సినిమా కోసం శ్రమిస్తున్నారు. ఈ సినిమాకి సంబందించిన తొలి షెడ్యూల్ నానక్ రామ్ గూడాలో వేసిన ప్రత్యేక సెట్ లో చిత్రీకరించారు. ఈ షెడ్యూల్ బాగా వచ్చిందని చిత్ర బృందం ఆనందంగా  ఉంది. నెక్ట్స్‌ షెడ్యూల్‌ను పొలాచ్చిలో మొదలు పెట్టనున్నారు.  ఫిబ్రవరిలో మొదలయ్యే ఈ షెడ్యూల్ కోసం చిత్ర బృందం సిద్ధమవుతోంది. అయితే ఈ సినిమా గురించి కొన్ని ఆసక్తిగా విషయాలు తెలిసాయి.

నరసింహారెడ్డి మేకప్ కోసం చిరు మూడు గంటలపాటు మేకప్ రూంలో కూర్చోవలసి వచ్చేదంట. చిన్న షాట్ తీయాలన్న మూడు గంటల పాటు మెగాస్టార్ మేకప్ రూంలో ఉండాల్సిందే. అందుకే డైరక్టర్ కొన్ని షాట్స్ ని డూప్ ని పెట్టి తీస్తానని చెప్పారంట. కానీ చిరు అందుకు ఒప్పుకోలేదని సమాచారం. అలా చేస్తే పాత్రలో తన బాడీ లాంగ్వేజ్, స్టైల్ మిస్సవుతుందని అన్నారట. ఆ డెడికేషన్ ఉండబట్టే ఆయన మెగాస్టార్ అయ్యారు. బాలీవుడ్ బిగ్ బీ అమితాబ్ బచ్చన్, జగపతి బాబు వంటి సీనియర్ నటులు నటించనున్న ఈ చిత్రంలో చిరంజీవి సరసన నయన తార హీరోయిన్ గా నటించనుంది. ఆమె నెక్స్ట్ షెడ్యూల్ నుంచి షూటింగ్ లో పాల్గొననుంది. కొణిదెల ప్రొడక్షన్స్ బ్యానర్లో రామ్ చరణ్ తేజ్ నిర్మిస్తున్న ఈ సినిమాపై భారీ అంచనాలున్నాయి.