తెలుగు ప్రజలతో పాటు.. సినిమా స్టార్లు కూడా పెద్ద పండుగను వైభవంగా జరుపుకున్నారు. యంగ్ టైగర్ ఎన్టీఆర్ అయితే చిన్న పిల్లాడిలా మారిపోయారు. పతంగులు చేతబట్టి.. “పదపదవే గాలిపటమా” అంటూ ఎగరవేస్తున్నారు. అంతేకాదు ఎలా ఎగురవేయాలో నేర్పిస్తున్నారు. ఇంతకీ ఎవరికో తెలుసా.. తన జిమ్ ట్రైనర్ లాయిడ్ స్టీవెన్స్ కి. ఇతను బాలీవుడ్ హీరోలైన హృతిక్ రోషన్, రణ్వీర్ సింగ్ లకు ఫిట్ నెస్ లో శిక్షణ ఇచ్చారు. తొలిసారి టాలీవుడ్ హీరో ఎన్టీఆర్ ని శిల్పంలా మలచడానికి వచ్చారు. నెల రోజులుగా స్టీవెన్స్ ఆధ్వర్యంలో తారక్ బరువు తగ్గుతున్నారు.
ఆ పనులను సంక్రాంతి సందర్భంగా పక్కన పెట్టి ఇద్దరూ కలిసి గాలిపటాలు ఎగురవేశారు. ఈ సంగతిని లాయిడ్ స్టీవెన్స్ ఫోటో ద్వారా ప్రపంచానికి తెలియజేసారు. “ఎన్టీఆర్ నాకు పతంగులను ఎలా ఎగరేయాలో నేర్పించారు. అందరికీ సంక్రాంతి శుభాకాంక్షలు” అని అతను ఫోటోను షేర్ చేస్తూ ట్వీట్ చేశారు. ఈ ఫోటో ప్రస్తుతం సోషల్ మీడియాలో చక్కర్లు కొడుతోంది. జై లవకుశ తర్వాత ఎన్టీఆర్ త్రివిక్రమ్ దర్శకత్వంలో నటించనున్న సంగతి తెలిసిందే. హారిక అండ్ హాసిని క్రియేషన్స్ బ్యానర్పై రాధా కృష్ణ నిర్మిస్తున్న ఈ సినిమా వచ్చే నెల సెట్స్ మీదకు వెళ్లనుంది. అంతలోపున ఎన్టీఆర్ స్లిమ్ గా, యువకుడిలా కనిపించడానికి కసరత్తులు చేస్తున్నారు.
