శివరాత్రి రోజున నందమూరి తారకరత్న కన్నుమూసిన సంగతి తెలిసిందే. 23 రోజులుగా బెంగళూరులోని నారాయణ హృదయాల హాస్పిటల్లో చికిత్స పొందుతూ వచ్చిన ఆయన పరిస్థితి విషమించడంతో.. చికిత్స పొందుతున్న సమయంలో కన్నుమూశారు. దీంతో టాలీవుడ్ కు పెద్ద షాక్ తగిలినట్టైంది. మరో రెండు రోజుల్లో అంటే ఫిబ్రవరి 22న తారకరత్న 40వ పుట్టినరోజు. కానీ ఇంతలోనే ఇలా జరిగింది. ఇదిలా ఉండగా.. తారకరత్న మరణవార్తతో నందమూరి ఫ్యామిలీ శోకసంద్రంలో మునిగిపోయింది అని చెప్పాలి. నందమూరి హీరోలు ఇప్పట్లో షూటింగ్లకు హాజరవడానికి ఇంట్రెస్ట్ చూపించడం లేదు.
దర్శకనిర్మాతలు కూడా వారిని ఇబ్బంది పెట్టడం లేదు. తారకరత్న తప్పకుండా కోలుకుంటాడు అని అనుకున్న టైంలో ‘అమిగోస్’ ను రిలీజ్ చేశారు. కళ్యాణ్ రామ్, ఎన్టీఆర్.. నిర్మాతల్ని ఇబ్బంది పెట్టడం ఇష్టం లేక ఆ చిత్రం ప్రమోషన్లలో పాల్గొన్నారు. బాలయ్య అయితే అనిల్ రావిపూడి దర్శకత్వంలో చేయాల్సిన సినిమా.. తన పార్ట్ మినహా మిగిలిన నటీనటుల పార్ట్ ను షూట్ చేసుకోమన్నారు.
ఇప్పుడు ఎన్టీఆర్ – కొరటాల శివ కాంబినేషన్లో తెరకెక్కాల్సిన సినిమా పూజా కార్యక్రమాలు కూడా వాయిదా వేసినట్టు చిత్ర బృందం ప్రకటించింది. ఈ చిత్రంలో ఎన్టీఆర్ హీరో కాగా కళ్యాణ్ రామ్ సహా నిర్మాతగా వ్యవహరించనున్నాడు. ఫిబ్రవరి 24న ఈ చిత్రానికి సంబంధించిన పూజా కార్యక్రమాలు నిర్వహించాల్సి ఉంది. కానీ తారకరత్న మరణంతో ఎన్టీఆర్, కళ్యాణ్ రామ్.. పూజా కార్యక్రమాలకు హాజరుకాలేరు. ఈ కారణంతో మళ్ళీ వాయిదా పడింది. కొత్త డేట్ ను త్వరలో అనౌన్స్ చేస్తామని చిత్ర బృందం తెలిపింది.
