ప్రముఖ రచయిత పరుచూరి గోపాలకృష్ణ మూడు తరాల హీరోలతో పనిచేసి అనేక విజయాలను అందుకున్నారు. ఇప్పుడు కొత్తవారికి రచనలో మెళకువలు నేర్పిస్తున్నారు. అంతేకాదు తన అనుభవాలను “పరుచూరి పలుకులు” పేరుతో పంచుకుంటున్నారు. తాజాగా అతను చెప్పిన ఓ సంఘటన నందమూరి అభిమానులను ఆనందింపచేస్తోంది. ఆ వివరాల్లోకి వెళితే.. మాస్ డైరక్టర్ వీవీ వినాయక్ ఆది ద్వారా అడుగుపెట్టి సంచలన విజయం సాధించారు. ఎన్టీఆర్ కెరీర్లో “ఆది” మరుపురాని చిత్రంగా నిలిచింది. నూనూగు మీసాల వయసులోనే భారీ డైలాగులు చెప్పి అదరగొట్టారు. ఈ సినిమా తెరెకెక్కించేటపుడు జరిగిన ఓ సంఘటనను పరుచూరి గుర్తుచేసుకున్నారు.
”నేను ‘ఆది’ సినిమాకు డైలాగ్స్ రాశాను. ఆ తర్వాత ఓ రోజు ఇంట్లో కూర్చొని ఆ డైలాగ్స్ పరిశీలిస్తుండగా నా కుమార్తె నాగసుష్మ వచ్చి ‘ఇవి బాలకృష్ణ డైలాగ్స్లా ఉన్నాయ్ కదా.. జూనియర్ ఎన్టీఆర్ చిన్నవాడు అతనికి ఇవి సూట్ అవుతాయా’ అని అడిగింది. వెంటనే నేను ‘ అది ఎన్టీఆర్ రక్తం.. ఎవ్వరు చెప్పినా అదిరిపోతుంది’ అని చెప్పా” అని వివరించారు. పరుచూరి నమ్మకాన్ని ఎన్టీఆర్ నిలబెట్టారు. సీనియర్ ఎన్టీఆర్, బాలకృష్ణ మాదిరిగా తారక్ డైలాగ్ చెప్పి తెలుగువారి అభిమానాన్ని సొంతం చేసుకున్నారు. ప్రస్తుతం త్రివిక్రమ్ శ్రీనివాస్ దర్శకత్వంలో నటించడానికి ఎన్టీఆర్ శ్రమిస్తున్నారు.
