పవన్ పుట్టిన రోజున ఫస్ట్ లుక్..!!

సర్దార్ గబ్బర్ సింగ్ తర్వాత పవర్ స్టార్ పవన్ కళ్యాణ్ చేస్తున్న సినిమా ఆలస్యంగా పట్టాలెక్కింది. తమిళ చిత్రం “వీరమ్” కు రీమేక్ గా వస్తున్న ఈ మూవీని మొదట తమిళ దర్శకుడు ఎస్.జె. సూర్య డైరక్ట్ చేయాలనుకున్నారు. ఆయన నటుడిగా బిజీ కావడంతో గోపాల గోపాల దర్శకుడు డాలీ ఆ బాధ్యతలు చేపట్టారు. రాయల సీమ నేపథ్యంలో సాగే ఈ కథలో పవన్ ఒక ఫ్యాక్షన్ లీడర్ గా కనిపించనున్నారు. అంతే కాదు ఆ లీడర్ కి ఆసక్తికరమైన ఓ లవ్ స్టోరీ కూడా ఉందట.

శరత్ మరార్ నిర్మిస్తున్న ఈ సినిమాలో పవన్ ప్రేమికురాలిగా శృతిహాసన్ నటిస్తోంది. ఇంట్రస్టింగ్ పాత్రలో పవన్ ని చూసుకోవాలని అభిమానులు రెండు నెలలుగా ఎదురుచూస్తున్నారు. మూవీ షూటింగ్ పోస్ట్ పోన్ అవుతుండడంతో వారు నిరాశ పడ్డారు. డాలీ మాత్రం పవన్ ఫ్యాన్స్ ని సంతోష పెట్టాలని భావిస్తున్నారు. పవర్ స్టార్ పుట్టిన రోజున కొత్త సినిమా ఫస్ట్ లుక్ ని విడుదల చేయాలని కసరత్తు ప్రారంభించారు. అంతేకాదు సినిమా టైటిల్ ను కూడా రివీల్ చేయాలని అనుకుంటున్నారు. అయితే సెప్టెంబర్ 2న పవన్ అభిమానులు రెండు పండుగలు జరుపుకోనున్నారన్న మాట.