ఆయన అలా చేయడం ఆశ్చర్యాన్ని కలిగించింది – పూజా హెగ్డే

ఎన్టీఆర్ ని సినిమాలో చూసిన వారందరూ.. గొప్ప నటుడు.. మంచి డ్యాన్సర్ అంటూ కితాబు ఇస్తుంటారు. అయితే అతనితో కాసేపు మాట్లాడినవారు మాత్రం ఎంత గొప్ప మనసున్న మనిషో చెబుతుంటారు. అలాంటిది గత మూడు నెలలలుగా పూజా హెగ్డే ఎన్టీఆర్ తో కలిసి ప్రయాణించింది. అరవింద సమేత వీర రాఘవ లో ప్రధాన హీరోయిన్ గా చేసింది. ఎన్టీఆర్ సినిమాకి అతని పేరుతోనే టైటిల్ ఉంటుంది. ఈసారి అరవింద పేరు ముందుకొచ్చింది. ఆ రోల్ కోసం ఎన్టీఆర్ తో కలిసి నటించింది. షూటింగ్ తో పాటు డబ్బింగ్ ని కూడా పూర్తి చేసిన పూజా హెగ్డే సినిమా అనుభవాలను పంచుకుంది. “త్రివిక్రమ్ శ్రీనివాస్ గారు నమ్మకంతో నాకు ‘అరవింద’ పాత్రను ఇచ్చారు. ఆయన సెట్లో చాలా ప్రశాంతంగా ఉండటం వలన షూటింగ్ సరదాగా సాగిపోయింది.

ఆయనతో కలిసి మరోసారి పని చేయాలని ఉంది. ఎన్టీఆర్ అంకితభావం స్ఫూర్తిదాయకం. ఆయన అంత పెద్ద స్టార్ అయినప్పటికీ, సెట్లో అందరితో కలివిడిగా ఉంటారు. ఎలాంటి సీన్ అయినా ఒకటి రెండు టేక్స్ లోనే ఆయన చేసేయడం ఆశ్చర్యాన్ని కలిగిస్తుంది. అదే ఆయనలోని గొప్పదనం. చినబాబు .. వంశీ ఇద్దరూ కూడా చాలా మంచి నిర్మాతలు. ఈ సినిమా గొప్ప విజయాన్ని సాధించాలని ఆశిస్తున్నాను” అని వెల్లడించింది. హారిక హాసిని క్రియేషన్స్ బ్యానర్లో నిర్మితమైన ఈ మూవీ ఈనెల 11 న రిలీజ్ కానుంది. వరుసగా నాలుగు విజయాల తర్వాత ఎన్టీఆర్ చేస్తున్న ఈ సినిమాపై భారీ అంచనాలున్నాయి.