విజయ్ దేవరకొండ (Vijay Devarakonda) కొత్త సినిమా ఏంటి? ఇదేం ప్రశ్న గౌతమ్‌ తిన్ననూరితో (Gowtam Naidu Tinnanuri) ఓ సినిమా ఉంటుందని ఇప్పటికే చెప్పేశారు కదా. ఆ మధ్య ఓపెనింగ్‌ అయ్యింది, త్వరలో షూటింగ్‌ కూడా అంటున్నారు అని అంటారా? అయితే మేం అనేది ఆ సినిమా తర్వాత ఏంటి అని? అలాగే ఆ సినిమా ముందుకెళ్తుందా? అని. ఈ డౌట్‌ ఎందుకు వచ్చింది అంటే.. ‘ఫ్యామిలీ స్టార్‌’ (Family Star) తర్వాత విజయ్ దేవరకొండ చుట్టూ పరిస్థితులు మారుతున్నాయి. ఈ క్రమంలో ఆయనను ప్రముఖ దర్శకుడు ప్రశాంత్ నీల్ (Prashanth Neel) కలవడం విశేషం.
టాలీవుడ్‌లో ప్రశాంత్ నీల్‌తో సినిమా చేయాలని చాలామంది హీరోలు వెయిట్‌ చేస్తున్నారు. అయితే ఆయన మాత్రం అందరికీ ఓకే చెప్పడం లేదు. ఇప్పటికే ఓకే చెప్పిన తారక్‌ (Jr NTR) సినిమా ఎప్పుడు ప్రారంభం అవుతుంది అనే విషయంలో క్లారిటీ లేదు. మరోవైపు రామ్‌చరణ్‌తో (Ram Charan) ఓ సినిమా చేస్తారు అనే చర్చ కూడా ఉంది. అయితే ఈ సమయంలో విజయ్ – ప్రశాంత్ నీల్ భేటీ ఆసక్తికరంగా మారింది. ఏదో సినిమా ప్లానే అని కొందరు అంటుండగా… అసలు సంగతి ఇదీ అంటూ విజయ్ టీమ్ చెప్పింది.
హైదరాబాద్ వచ్చిన ప్రశాంత్ నీల్ విజయ్ దేవరకొండ ఇంటికి వెళ్లడం నిజమేనని, అయితే సినిమా చేస్తున్నారని పుకార్లు నిజం కావు అని టీమ్ చెబుతోంది. అలాగే ప్రశాంత్ నీల్ టీమ్ కూడా ఇదే మాట చెబుతోంది. అయితే సినిమా లేనప్పుడు ఇప్పుడు విజయ్ దగ్గరకు ప్రశాంత్ నీల్ ప్రత్యేకంగా రావాల్సింది ఏముంది అనేది మరికొందరి ప్రశ్న. ప్రస్తుతం ప్రశాంత్ నీల్ ‘సలార్‌ 2’ (Salaar) ప్రీ ప్రొడక్షన్ పనుల్లో బిజీగా ఉన్నారు. కాబట్టి ఆ సినిమా కోసం వచ్చి ఉండొచ్చు అనే చర్చ జరుగుతోంది.
నిజానికి ‘సలార్‌ 2’లో ఓ స్పెషల్ పాత్ర ఉందని, దానిని ఓ యంగ్‌ హీరో చేస్తే బాగుంటుందని అనుకుంటున్నారని ఆ మధ్య వార్తలొచ్చాయి. అయితే ఆ తర్వాత ఎలాంటి చప్పుడూ లేదు. ఇప్పుడు విజయ్‌ను ప్రశాంత్ కలవడంతో దాని కోసమేమో అని అంటున్నారు. ఇప్పుడే విషయం ఎందుకు చెప్పడం అని ఆగుతున్నారేమో అనే చర్చ కూడా సాగుతోంది.
Home