ఏరు దాటేసిన తర్వాత తెప్ప తగలేసినట్టు.. అని తెలుగులో మంచి సామెత ఉంది. రాధికా ఆప్టే తీరు చూస్తుంటే ఈ సామెత గుర్తొస్తోంది. సినిమా రంగంలో తనకంటూ గాడ్ ఫాదర్ లేకుండగానే అనేక చిత్రాల్లో నటించి మంచి పేరుతో పాటు.. డబ్బులు సంపాదించుకుంది. తెలుగులో రక్తచరిత్ర, లెజెండ్, లయన్ చిత్రాల్లో నటించిన ఈ భామ బాలీవుడ్ లో బిజీ కాగానే.. తెలుగు చిత్ర పరిశ్రమలో హీరోయిన్లని హీనంగా చూస్తారని చెప్పి తెలుగు పరిశ్రమకు దూరమైంది. మొన్నటిమొన్న ఓ ఇంటర్వ్యూ లో మాట్లాడుతూ దక్షిణాదికి చెందిన ఓ నిర్మాత తనను పడక గదిలోకి రమ్మని పిలిచాడని చెప్పి షాకిచ్చింది. ‘కబాలి’ లో రజినీకాంత్ సరసన నటించిన రాధికా ఆప్టే.. ఈ మాటలతో కోలీవుడ్ లోను.. అసలు దక్షిణాదిన ఎవరూ ఛాన్స్ ఇవ్వకుండా చేసుకుంది.
ఇక తాజాగా బాలీవుడ్ పై తీవ్ర విమర్శలు చేసి వివాదాల్లో నిలిచింది. రీసెంట్ గా ఓ ఇంటర్వ్యూ లో మాట్లాడుతూ ..” సినిమాల్లో రాణించాలంటే బ్యాక్గ్రౌండ్ తప్పనిసరి. నాకు అలాంటి నేపథ్యం లేకపోవడం వల్లే ఈ స్థాయికి రావడానికి చాలా కష్టపడాల్సి వచ్చింది. ఒకప్పుడు అందాల ప్రదర్శనకు నేను వ్యతిరేకిని. కానీ, డబ్బు కోసం కొన్ని చెత్త సినిమాల్లో కూడా నటించాల్సి వచ్చింది. ఇప్పుడు నాకు డబ్బుకు, హోదాకు కొదవలేదు..అందుకే నేను ఇక నుంచి ఎలాంటి చెత్త సినిమాల్లో నటించను” అని సంచలన కామెంట్స్ చేసింది. రాధికా మాటలు ప్రస్తుతం అన్ని చిత్ర పరిశ్రమల్లో చర్చకు దారితీసింది. అందరూ ఆమెను పక్కన పెట్టాలనే నిర్ణయం తీసుకోబోతున్నారు. మరి రాధికా క్షమాపణలు చెబుతుందా? లేక వెండితెర కి గుడ్ బై చెబుతుందా? అనేది ఆసక్తికరంగా మారింది.
