వీటిలో రాజమౌళి సినిమా ఏది..?

దర్శక ధీరుడు రాజమౌళి. అయన చిరునామా కృషికి, విజయానికి మాత్రమే తెలుసు. పొరపాటున పరాజయం ఆయన్ని ఇంతవరకు పలకరించలేదు. అందుకే ఎంతమంది దర్శకులు సినిమా చివర్లో ఎన్ని రకాలుగా తమ ముద్రలు వేసుకున్నా అందులో రాజమౌళి ‘రాజముద్ర’ అగ్రపీఠం సొంతం చేసుకుంది. ఇంతటి చరిత గల ఈ దర్శకుడి నుండి ఓ సినిమా వస్తుందంటే సహజంగానే అంచనాలు నెలకొంటాయి. ‘బాహుబలి’ రూపేణా అవి పెరిగాయే తప్ప తరగలేదు. ఇప్పుడు రాజమౌళి చేస్తున్న ‘బాహుబలి 2’ చిత్రీకరణ త్వరలో ముగియనుంది. నిర్మాణాంతర పనులు ముగించుకొని వేసవి నాటికి థియేటర్లోకి రానుందీ సినిమా. అయితే రాజమౌళి తర్వాతి చిత్రమేమిటి…? అన్న విషయంపై ఎప్పట్నుంచో చర్చ జరుగుతూ వస్తుంది.

రాజమౌళి సహా ఆయన బృందం ఈ విషయమై నేటివరకు నోరు మెదపలేదు సరికదా కంటిసైగ కూడా చేసింది లేదు. ఎవరికీ వారు తమ ఊహాగానాలకు వంత పాడుతూ ‘గరుడ’, ‘మహాభారతం’ అని కథలు కథలుగా చెప్పుకుంటూ వస్తున్నారు. ఆ సినిమాల్లో హీరోలుగా ఎన్టీఆర్, మహేశ్ బాబు, విక్రమ్ వంటి వారి పేర్లు కూడా మార్మోగిపోతున్నాయి. మరోవైపు రాజమౌళి చిత్రాల రచయిత, తండ్రి అయినా విజయేంద్ర ప్రసాద్ ‘బాహుబలి’ ఊపుతో కొత్త కథలు రాస్తూనే పాత కథలకు కొత్త సొబగులద్దే పనుల్లో నిమగ్నమై ఉన్నట్టు వార్తలొస్తున్నాయి. ‘ఒకే ఒక్కడు’, ‘విక్రమార్కుడు’ వంటి సినిమాల సీక్వెల్ కోసం విజయేంద్ర ప్రసాద్ కలం జోరుగా కదులుతోందట. మరి వీటన్నటిలో రాజమౌళి దేనికి ఆమోదం తెలిపి దానిపై వారి ‘రాజముద్ర’ వేస్తారో చూడాలి.

Also, do SUBSCRIBE to our YouTube channel to get latest Tollywood updates.