టాలీవుడ్‌లో యాక్షన్‌ కొరియోగ్రాఫర్లు రామ్‌ – లక్ష్మణ్‌ అంటే ప్రత్యేక శైలి. సీనియర్‌ స్టార్‌ హీరోలకు వారు అందించే యాక్షన్‌ కొరియోగ్రఫీకి పెద్ద ఫ్యాన్‌ బేసే ఉంది. హీరోల బాడీ లాంగ్వేజ్‌ బట్టి వారు ఫైట్స్‌ రూపొందిస్తూ ఉంటారు. అలా తాజాగా వారు ‘అఖండ 2: తాండవం’ సినిమాకు యాక్షన్‌ కొరియోగ్రఫీ చేశారు. ఈ సినిమా వచ్చే నెల 5న విడుదల అవుతున్న నేపథ్యంలో మీడియాతో మాట్లాడారు. ఈ క్రమంలో మంచు పర్వతాల మధ్యలో బాలకృష్ణ చేసిన సాహసం గురించి చెప్పుకొచ్చారు.
గన్‌ శక్తిమంతమైనది. దానికి త్రిశూలం, దైవత్వం తోడైతే ఇంకా బలంగా మారుతుంది. ఇప్పుడు ‘అఖండ 2: తాండవం’లో పోరాట ఘట్టాలు అలానే ఉంటాయి అని రామ్‌లక్ష్మణ్‌ అంటున్నారు. అభిమానుల్ని, ప్రేక్షకుల్ని అలరించడం కోసం ఈ సినిమాలో 99 శాతం యాక్షన్‌ సన్నివేశాల్ని బాలకృష్ణ స్వయంగా చేశారని చెప్పారు. డూప్‌ అనే ఆలోచన వద్దని చెప్పారట బాలయ్య. ఈ సినిమాకి పనిచేయడం ఎంతో ప్రత్యేకమని చెప్పారు ఈ యాక్షన్‌ కొరియోగ్రఫీ బ్రదర్స్‌.
సినిమా సెట్‌లో బాలకృష్ణని చూస్తున్నప్పుడు ఒక దైవికశక్తిని చూస్తున్నట్టే ఉంటుందన్నారు. ‘అఖండ’ సినిమాలో బాలకృష్ణను అఘోరాగా పరిచయం మాత్రమే చేశారని.. ఇప్పుడు రెండో పార్టులో ఆ పాత్ర విశ్వరూపాన్ని చూస్తారని చెప్పారు. ఈ సినిమాలో బాలయ్య పాత్ర మూడు కోణాల్లో ఉంటుందని, అభిమానులను అలరించడాని బాలయ్య సాహసోపేతమైన సన్నివేశాల్ని చేశారని చెప్పారు. హిమాలయాల్లో చలికి తట్టుకోలేక కోట్లు వేసుకుని తాము సెట్‌కి వెళితే, బాలకృష్ణ తన పాత్రకు తగ్గట్టుగానే భుజాలు కనిపించే దుస్తులతోనే వచ్చారని తెలిపారు. ఆ దుస్తులతో గంటల తరబడి మంచు మధ్యలో చలిలో నిలబడి పోరాట సన్నివేశాల్ని పూర్తి చేశారని రామ్‌లక్ష్మణ్‌ చెప్పారు.
ఇక తమకు అప్‌డేటెడ్‌ వెర్షన్‌గా అబ్బాయి రాహుల్‌ని కూడా ఈ రంగంలోకి తీసుకొచ్చామని చెప్పారిద్దరూ. కొన్ని పోరాట ఘట్టాల్ని డిజైన్‌ చేస్తున్నప్పుడు ఇప్పుడు ట్రెండ్‌ ఇలా ఉంది, ఇలా చేద్దాం అని రాహుల్‌ సలహా ఇస్తుంటాడట. త్వరలోనే తనను యాక్షన్‌ డైరెక్టర్‌గా పరిచయం చేస్తామని చెప్పారు రామ్‌లక్ష్మణ్‌.
