సూర్యను పవన్ తప్పించడానికి వెనుకున్న రహస్యం

పవర్ స్టార్ పవన్ కళ్యాణ్ చేసే ప్రతి పని వెనుక బలమైన కారణం ఉంటుందని ఆయన మరో సారి రుజువు చేశారు. సర్దార్ గబ్బర్ సింగ్ తర్వాత తమిళ్ డైరక్టర్ ఎస్.జె.సూర్య తో పవన్ సినిమా చేయడానికి సిద్ధమయ్యారు. ముహూర్తం షాట్ కూడా తీశారు. మరో రెండు రోజుల్లో రెగ్యులర్ షూటింగ్ మొదలు కానుందనుకునేలోపే డైరక్టర్ మారిపోయారు. తమిళం లో సూపర్ హిట్ సాధించించిన “అజయ్ వీరమ్” చిత్రాన్నిరీమేక్ చేసే బాధ్యత డాలి (కిషోర్ కుమార్) చేతికొచ్చింది. పవన్ ఎందుకు ఇలా చేశారు? మరో సారి తప్పు చేస్తున్నారు అని విమర్శలు వినిపించాయి. అసలు విషయం తెలిసి విమర్శించిన నోళ్లే కీర్తించాయి.

అసలు విషయం ఏమిటంటే..
పవన్ కి ఖుషి హిట్ ఇఛ్చిన దర్శకుడు ఎస్.జె.సూర్యలో చక్కని నటుడున్నాడు. అతను తాజాగా నటించిన ఇరైవి తమిళ్ సినిమా హిట్ కావడంతో సూర్యకు నటుడిగా అవకాశాలు పెరిగాయి. అటు తమిళంలో రెండు చిత్రాల్లో నటించనున్నారు. సూపర్ స్టార్ మహేష్ బాబు హీరోగా కమర్షియల్ డైరక్టర్ ఏ.ఆర్.మురుగదాస్ తెలుగు, తమిళం భాషల్లో తెరకెక్కించనున్న మూవీలోనూ విలన్ గా ఎస్.జె.సూర్య ఖరారు అయ్యారు. రూ. 80 కోట్లతో నిర్మితమవుతున్నఈ సినిమా వచ్చే నెల సెట్స్ మీదకు వెళ్లనుంది. నటుడిగా, దర్శకుడిగా డేట్స్ అడ్జస్ట్ చేయలేక ఈ విషయాన్ని పవన్ కి వివరించారు. అందుకు పవర్ స్టార్ సానుకూలంగా స్పందించి నటుడిగా ముందుకి వెళ్లమని ప్రోత్సహించారు. దాంతో సూర్య సమస్య తీరింది.

దర్శకుడు డాలి గోపాల గోపాల చిత్రంలో పవన్ ని చాలా బాగా చూపించారు. హిందీ “ఓ మై గాడ్” సినిమాని మార్పులు చేసి పవన్ ఇమేజ్ తగ్గకుండా చిత్రీకరించారు. అతని పనితనం నచ్చడంతో అప్పుడే మనమిద్దరం మరో సినిమాకు కలిసి పనిచేస్తామని డైరక్టర్ కి పవర్ స్టార్ మాట ఇచ్చారు. ఈ సంగతి మరిచి పోని పవన్ .. అతన్ని పిలిచి మరో రీమేక్ కి అవకాశం ఇచ్చాడు. ఒకే నిర్ణయంతో సూర్యకి దొరికిన పని పోలేదు. డాలికి పని దొరికింది. త్వరలో పవన్ తెరపై ఫ్యాక్షనిస్ట్ గా పవర్ చూపించనున్నారు.