రోబోకి లీకుల బెడద..!

బాక్సాఫీస్ వసూళ్ల విషయంలో చిన్న సినిమాకీ పెద్ద సినిమాకి తేడాలుంటాయేమో గానీ లీకేజీల విషయంలో ఈ తేడా ఉండదు. అయితే పెద్ద సినిమాల విషయంలో ఇది బాగా ప్రచారం అందుకుంటుంది. ఇక్కడ స్టార్.. నాన్ స్టార్ అన్న వ్యత్యాసం లేనేలేదు. ఎవరి సినిమాలైనా ఏదో ఒక దశలో ఏదో రకంగా విడుదలకు ముందే నెట్టింట్లో ప్రత్యక్ష్యమైపోతున్నాయి. ఎన్ని జాగ్రత్తలు తీసుకున్నప్పటికీ ఈ సమస్యకి అడ్డుకట్ట వేయడంలో అవి విఫలమవుతూనే ఉన్నాయి. అత్తారింటికి దారేది, బాహుబలి, జనతా గ్యారేజ్ వంటి బడా సినిమాలను ఇదివరకు ఈ సమస్యను ఎదుర్కొనగా ఇప్పుడు రజనీ సినిమాకి ఈ గండం చుట్టుకుంది.

సూపర్ స్టార్ రజనీకాంత్ ప్రస్తుతం శంకర్ తెరకెక్కిస్తున్న టెక్నికల్ వండర్ ‘రోబో 2.0’ నటిస్తోన్న సంగతి తెలిసిందే. కొంత విరామం తర్వాత ఇటీవల రజని చిత్రీకరణలో పాల్గొన్నారు. మరోవైపు దర్శకుడు శంకర్ ఈ సినిమాని ముందు భాగం కంటే బాగా రావాలని అహర్నిశలు శ్రమిస్తున్నారు. రజనీ అభిమానులని తృప్తి పరిచేందుకు దసరా కానుకగా ‘రోబొ2’ ఫస్ట్ లుక్ డిజైన్ చేయించారట. అధికారికంగా విడుదల చేయకముందే అది వెబ్ ప్రపంచంలో దర్శనమివ్వడంతో చిత్ర బృందం ఖంగు తిన్నారట. గతంలో ఈ సినిమాలో విలన్ గా నటిస్తోన్న అక్షయ్ కుమార్ కి లుక్ కూడా ఇలానే బయటికొచ్చింది. ఇప్పుడు శంకర్ అదే డిజైన్ ని విడుదల చేస్తారా లేక కొత్త డిజైన్ చేయిస్తారా అన్నది తెలియాల్సి ఉంది. త్వరలో షూటింగ్ ముగియనున్న ఈ సినిమా గ్రాఫిక్స్ సహా ఇతర నిర్మాణాంతర కార్యక్రమాలు పూర్తి చేసుకుని వేసవిలో విడుదల కానుంది.

https://www.youtube.com/watch?v=Lr-kS47yD38